Ինչպես «փրկվեցին» նախկին պաշտոնյաների ղեկավարած հիմնադրամները

Հեղափոխությունից անմիջապես հետո իշխանությունների թիրախում հայտնվեցին նախկին պաշտոնյաների անվան հետ կապակցվող հիմնադրամները, քրեական գործեր հարուցվեցին՝ հափշտակումների, չարաշահումների մասով: Անցել  է երեք տարի, սակայն, վերը նշված աղմկահարույց քրեական գործերից որևէ նորություն չկա, իսկ նախկին պաշտոնյաների հետ առնչվող հիմնադրամների մեծ մասը բնականոն գործունեություն է ծավալում նաև այսօր:

Հեղափոխությունից հետո աղմուկ բարձրացվեց «Լույս» հիմնադրամի շուրջ, որի հոգաբարձուների խորհրդի անդամ է հանդիսանում Սերժ Սարգսյանը: Աղմուկը, սակայն, ավարտվեց հիմնադրամի գործունեության կասեցմամբ:

Այնուհետև Ազգային անվտանգության ծառայությունը խուզարկություններ էր անցկացրել «Երևան» հիմնադրամում: Ըստ ԱԱԾ հաղորդագրության, իրենք հաղորդում էին ստացել քաղաքացիներից, որ Երևանի քաղաքապետարանի պաշտոնատար անձինք, կառուցապատման և գույքի ձևակերպման համապատասխան թույլտվություններ տրամադրելու դիմաց, բացի օրենքով սահմանված վճարումներից, իրենց պարտադրել են «Երևան» հիմնադրամին փոխանցել խոշոր գումարներ: «Երևան» հիմնադրամի հոգաբարձուների խորհրդի ղեկավարը քաղաքապետ Տարոն Մարգարյանն է, անդամների թվում են փոխքաղաքապետեր, քաղաքապետարանի պաշտոնյաներ, ավագանու անդամներ: Սակայն, ինչպես գիտենք, նրանցից և ոչ մեկի հանդեպ քրեական հետախուզում չի հայտարարվել:

Լևոն Սարգսյանի, նրա դստեր ու որդու՝ ապօրինի հարստացման և հայտարարագրման ենթակա գույքը թաքցնելու փաստերով հարուցվել էր քրեական գործ: Քրեական գործի կենտրոնում էլ հայտնվել էր Սարգսյանի Փյունիկ հիմնադրամը՝ Այվազովսկու գողացված կտավի գործով:Խոսքը 2017-ին «Փյունիկ» հիմնադրամի կողմից Սերժ Սարգսյանին նվիրաբերված Հովհաննես Այվազովսկու «Նավը ծովում» կտավի մասին է:   Նշված կտավը 2011-ին գողացվել էր ռուս գործարար Ալեքսանդր Տարանցևի առանձնատնից։ «Փյունիկն» իր հաղորդագրության մեջ նշել էր, եր «երկրի նախագահը արժեքավոր նվերը հանձնել է Հայաստանի պատմության թանգարանին»։ Ավելի ուշ պարզվել էր, որ ոչ Հայաստանի պատմության թանգարանում, ոչ էլ Ազգային պատկերասրահում «Նավը ծովում» կտավ չկա։ Իսկ երեք տարի անց չկա ոչ առաջընթաց քրեական գործում, ոչ էլ կալանավորվածներ:

Այնուհետև մեղադրանք առաջադրվեց «Հայաստան» համահայկական հիմնադրամի տնօրեն Արա Վարդանյանին՝ յուրացումների և հափշտակության մասով: Վարդանյանը 10 միլիոն դրամ գրավի դիմաց ազատ արձակվեց, իսկ հիմնադրամը իշխանությունները իրենցով արեցին՝ դնելով նորանոր կոռուպցիոն սկանդալների կիզակետում:

ԿԳՄՍ նախարարության դիմումի հիման վրա դատախազությունը քրեական գործ հարուցեց Այբ հիմնադրամի դեմ՝ Այբ» կրթական հիմնադրամի կողմից իրականացվող «Կրթության գերազանցության ազգային ծրագրի» շրջանակներում թույլ տրված հնարավոր չարաշահումների, մասնավորապես ծրագրի իրականացման նպատակով ՀՀ պետական բյուջեից նվիրատվությամբ հատկացված միջոցներից շուրջ 8.3 մլն ՀՀ դրամ ենթադրաբար վատնման եղանակով հափշտակելու կապակցությամբ հարուցվել է քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով: Մինչ օրս, սակայն, չի հաջողվել ապացուցել ներկայացված մեղադրանքը:

«Լոռու առողջապահություն» հիմնադրամին 1 % պահումների մասով քրեական գործը կարճվել է՝ հանցակազմի բացակայության հիմքով:

Այնուհետև՝ ՀՀ քննչական կոմիտեում քրեական գործ է հարուցվել «Մարտիկ» հիմնադրամում արձանագրված չարաշահումների դեպքով:«Մարտիկ» հիմնադրամը ստեղծվել է 2002թ-ին։ Հիմնադրամի գործադիր տնօրենը Սեդրակ Սեդրակյանն է: Հիմնադրամի պաշտոնական կայքում հրապարակված տեղեկատվության համաձայն` հիմնադիրների թվում է Սերժ Սարգսյանը:

Ինչպես տեսնում ենք՝ չկան ոչ կալանավորվածներ, ոչ էլ առավել ևս դատարանի մեղադրական վճիռներ, այն պարզ պատճառով, որ վերը նշված քրեական գործերը կամ կարճվել են, կամ չեն հասել դատարան: Ինչի՞ մասին է սա վկայում, կամ հեղափոխությունից հետո էյֆորիայի պահպանման և թեժացման նպատակով պոպուլիստական հայտարարություններ են արվել և շինծու քրեական գործեր են կարվել վերը նշված հիմնադրամների մասով և դա է պատճառը, որ առ այսօր որևէ գործով առաջընթաց չկա, կամ էլ գործ ունենք ինչ-ինչ քաղաքական պայմանավորվածությունների հետ: