Բոլոր տեսակի իշխանությունների համար նվեր է նման ընդդիմադիր գործունեությունը. Սիմոնյան

Նման ընդդիմադիր գործունեությունը բոլոր տեսակի իշխանությունների համար նվեր է։ Խորհրդարանում իր ելույթի ժամանակ այս մասին ասաց ԱԺ նախագահ Ալեն Սիմոնյանը։

«Այս գործունեությունը, այս բառապաշարը, որն այս ժամանակահատվածում դրսևորվում է, նվեր է և հավատացեք՝ իշխանությունը դրանից միայն շահում է։ Երբ ՀՀ օրհներգը հնչում է և դրանից հետո պատգամավորը խոսում է իմ հանգստի մասին, դա միայն կարող է հետաքրքրել խոհանոցում և ֆեյսբուքում նստած ինչ-որ քանակությամբ մարդկանց, բայց քաղաքական առոմով դրանք զրո նշանակություն ունեն»,-նշեց Ալեն Սիմոնյանը։

Նրա խոսքով բոլորը գիտեն, թե այդ դահլիճում ովքեր են կոռումպացված, ով որտեղից է սնվում։ Ալեն Սիմոնյանը նշեց, որ իր և գործընկերների անձնական կյանքի մասին հնարել են ամեն ինչ։

«Վերցրել են նախադասություն, հետո ֆեյքերով ինչ-որ մեկը տակը դրել է, որ օրինակ X հյուրանոցն արժի 2 մլն դրամ և հետո չի էլ լինում այդ մարդուն բռնել, որ ականջներից բռնեն այդ սուտասան տականքին, որ օրենքի առաջ պատասխան տա։ Չի լինում, որովհետև ֆեյք է, բայց գալիս են այդ ֆեյքի հիման վրա այստեղ հայտարարություններ են անում»,-ասաց ԱԺ նախագահը։

Վերջինս նաև նշեց, որ Վազգեն Սարգսյանն ազգային հերոս է, արժեք և որևիցե մեկը դահլիճում չի փորձի նման մարդկանց մասին որևէ վատ բան ասի։

«Այո, Վազգեն Սարգսյանը և Ռոբերտ Քոչարյանը պատմության մեջ կմնան։ Վազգեն Սարգսյանն իր ձևով, Ռոբերտ Քոչարյանն իր ձևով։ Այ թե ինչ ձևով, դա արդեն տարբեր և վիճելի խոսակցություն է»,-նշեց Ալեն Սիմոնյանը։