Իշխանությունները փորձում են պայքարել ֆեյքերի դեմ՝ պայքարելով ԶԼՄ–ների դեմ. Արամ Վարդեւանյան

«ԶԼՄ ներկայացուցիչները վերջին երեք տարիների ընթացքում տեսել են՝ ինչպիսի գրոհներ են տեղի ունեցել իրենց նկատմամբ՝ հենց իշխանությունների կողմից, նրանք գիտեն՝ այս իշխանություններն ինչ անհանդուրժող են քննադատության նկատմամբ և այդ ամբողջի համակցությունն արտահայտվել է հենց այս օրենքի մեջ»: Այս մասին այսօր՝ հոկտեմբերի 21-ին, խորհրդարանում «Զանգվածային լրատվության մասին» օրենքում փոփոխությունների նախագծի վերաբերյալ քննարկման ժամանակ ասաց «Հայաստան» խմբակցության պատգամավոր Արամ Վարդևանյանը:

«Իշխանությունները նոր նախագծով, փորձում են պայքարել ֆեյքերի դեմ, բայց պայքարում են ԶԼՄ-ի դեմ, այսինքն՝ ոչ թե ասում են անանուն դոմեյն ունենալն է խնդիր, այլ՝ անանուն դոմեյնին հղում տալն է խնդիր: Եթե ասում ենք՝ անանուն դոմեյնի խնդիր կա, ուրեմն պետք է ասենք՝ անանուն դոմեյնն է խնդիրը, ոչ թե ԶԼՄ-ն, որը հղում է տալիս այդ դոմեյնին: Լրատվամիջոցը իր գործունեության մեջ պետք է ունենա ազատություն, դա լինի ցանկալի, թե՝ ոչ»,-ասաց պատգամավորը:

«Նախագծով պահանջվում է լրատվամիջոցից հաշվետվությունը ներկայացնել, իսկ պահանջը չկատարելու դեպքում առաջարկում են 500 000 դրամից մինչև 700 000 դրամ տուգանքի ենթարկել տվյալ լրատվամիջոցին: Այս իշխանությունը դրական վերաբերմունք ունի ցանկացած ֆեյքային գործունեության նկատմամբ: Ֆեյք նյուզի դեմ պայքարելու համար պետք է ունենալ մի իրականություն, որտեղ իշխանությունը չի հանդուրժում արծրունովհաննիսյանական ճշմարտությունը, բայց կարծես թե հենց իրենք էլ այդ ամենը գեներացնելն են»,-նշեց Վարդևանյանը: