«100 տարի անց Աթաթուրքի ծրագիրը՝ «Զանգեզուրի միջանցքը», կյանքի կկոչվի՝ անկախ Հայաստանի դիրքորոշումից․ թուրք փորձագետ

«Զանգեզուրի միջանցքի» նշանակությունը, որը Նախիջևանի միջով Թուրքիան կապելու է Ադրբեջանի արևմտյան շրջանների և հետագայում Կենտրոնական Ասիայի երկրների հետ, ժամանակի ընթացքում միայն կաճի։ Այս մասին Anadolu-ին տված հարցազրույցում ասել է Սեւծովյան տեխնիկական համալսարանի (Տրապիզոն) պրոֆեսոր Իսմայիլ Քոսեն։

Նրա խոսքով՝ «Զանգեզուրի միջանցքը» ղարաբաղյան 44-օրյա պատերազմի հիմնական արդյունքներից է։

Քոսեն կարծում է, որ սկզբում նավթն ու գազը չեն փոխադրվի այս ճանապարհով, քանի որ ներդրողները խոշոր նախագծեր են իրականացնում միայն անվտանգության համապարփակ երաշխիքների առկայության դեպքում։ «Ժամանակ է պետք, որպեսզի միջանցքն իրեն դրսևորի առանց խնդիրների»,- ասել է նա։

Քոսեն հայտարարել է, որ հավասարակշռված տարածաշրջանային քաղաքականություն և Հայաստանի հզորացում հնարավոր է միայն Թուրքիայի հետ նորմալ հարաբերությունների առկայության դեպքում, սակայն Հայաստանում դեմ են «Զանգեզուրի միջանցքի» ստեղծման գաղափարին, մինչդեռ Ռուսաստանը մինչ այժմ մեծ ուշադրություն չի դարձնում այդ երթուղու վրա։ «Թուրքիան կարող է զարգանալ՝ առանց Հայաստանի հետ երկխոսության, մինչդեռ Երևանն առանց Անկարայի հետ կապերի կապվելու է միայն Ռուսաստանի և Իրանի հետ»,֊հայտարարել է Քոսեն։

«Կարծում եմ՝ Հայաստանը դա հասկանում է։ Փաշինյանը կդիմադրի, բայց ելքը հիմնականում կանխորոշված ​​է. 100 տարի անց Թուրքիայի Հանրապետության հիմնադիր Մուստաֆա Քեմալ Աթաթուրքի՝ Թուրքեստան-Կենտրոնական Ասիա միջանցք ստեղծելու ծրագիրը կյանքի կկոչվի»,- ասել է Քոսեն։