Ալմա֊Աթայում վերսկսվել են բախումները ցուցարարների և ոստիկանների միջև (լուսանկարներ)

Ալմա֊Աթայի կենտրոնում վերսկսվել են բախումները ցուցարարների և ոստիկանների միջև։

Հաղորդվում է, որ իրավապահները քաղաքի կենտրոնում կանգնեցրել են մի քանի հարյուր ցուցարարների։ Անօրինական գործողությունների մասնակիցների մոտ մահակներ են եղել։ Անվտանգության ուժերը ցուցարարների դեմ հատուկ տեխնիկա են օգտագործում, այդ թվում՝ խլացուցիչ նռնակներ։

Գործակալության թղթակցի փոխանցմամբ՝ ցուցարարները բռնել են մի քանի ոստիկանի և ծեծի են ենթարկել։

Ինչպես հայտնի է, Ղազախստանում բողոքի ակցիաները սկսվել են Նոր տարվա առաջին օրերին։ Ժանաոզենի և Ակտաուի բնակիչները, որոնք գտնվում են նավթարդյունահանող տարածաշրջանում, սկսել են չարտոնված ցույցերի գնալ՝ կապված հեղուկ գազի թանկացման հետ։
 Նախագահ Կասիմ-Ժոմարտ Տոկաևը հանձնարարել է ստեղծել հանձնաժողով՝ ուսումնասիրելու իրավիճակը։ Նախօրեին նա հայտարարել է, որ պատրաստ է կատարել ցուցարարների հիմնական պահանջը և նվազեցնել գազի գինը։

Սակայն բողոքի ակցիաները տարածվեցին այլ քաղաքներում։ Ալմա֊ Աթայում հունվարի 4-ի երեկոյան ցուցարարները բախվել են անվտանգության ուժերի հետ, որոնք օգտագործել են գազ և խլացուցիչ նռնակներ։ Տոկաևը կոչ է արել մարդկանց ցուցաբերել խոհեմություն և չտրվել ներսից և դրսից սադրանքներին։ Նրա խոսքով՝ իշխանությունը չի ընկնի, երկրին «ոչ թե հակամարտություն է պետք, այլ փոխադարձ վստահություն ու երկխոսություն»։

Ավելի ուշ պետության ղեկավարը արտակարգ դրություն է մտցրել Ալմա֊ Աթայում և Մանգիստաու շրջանում։ Այն կգործի մինչև հունվարի 19-ը և ներառում է պարետային ժամը 23:00-07:00-ը, զանգվածային միջոցառումների արգելք, ազատ տեղաշարժի սահմանափակում, զենքի և զինամթերքի վաճառքի արգելք և հատուկ ռեժիմի սահմանում:

Այսօր՝ հունվարի 5-ի առավոտյան, Տոկաևը ցրել է կառավարությունը, որը, ըստ նրա, հատկապես մեղավոր է այս իրավիճակը թույլ տալու համար։ Նա նաև նշել է, որ իրավիճակը Ալմա-Աթայում և Մանգիստաու շրջանում աստիճանաբար բարելավվում է արտակարգ դրության հաստատումից հետո։