ՆԱՏՕ-ի գլխավոր քարտուղարը պաշտպանել է Թուրքիայի դիրքորոշումը

ՆԱՏՕ-ի գլխավոր քարտուղար Յենս Ստոլտենբերգը պաշտպանել է Թուրքիայի դիրքորոշումը Շվեդիայի և Ֆինլանդիայի՝ Հյուսիսատլանտյան դաշինքին միանալու հարցում։

«Ոչ մի երկիր չի տուժել ահաբեկչությունից, ինչպես Թուրքիան»,- ասել է նա՝ անվանելով Անկարային ՆԱՏՕ-ի կարեւոր դաշնակից։

Ըստ Ստոլտենբերգի՝ երբ դաշնակիցը մտահոգություններ ունի, հարցը պետք է քննարկվի և լուծվի։ «Միշտ այդպես է եղել։ Օրինակ՝ Հունաստանն օգտագործեց իր վետոյի իրավունքը՝ արգելափակելու Հյուսիսային Մակեդոնիայի անդամակցությունը ՆԱՏՕ-ին՝ պետության անվան պատճառով: Խնդրի լուծման համար պահանջվեց ավելի քան 10 տարի»,- նրա խոսքերն է մեջբերում Anadolu-ն։

Դաշինքի ղեկավարը դեմ է արտահայտվել նաև իսպանացի լրագրողների՝ քրդերին «Քուրդիստանի աշխատավորական կուսակցության»  հետ նույնացնելու փորձին: «Դուք խոսում եք քրդերի մասին, բայց եկեք ընդունենք, որ խոսքը մի քանի քրդական խմբավորումների մասին է, և «Քուրդիստանի աշխատավորական կուսակցությունը» ներառված է ԵՄ-ի ահաբեկչական կառույցների ցուցակում։ Կարևոր չէ՝ նրանք Շվեդիայում են, թե Ֆինլանդիայում»մ- ասել է նա։

ՆԱՏՕ-ի գլխավոր քարտուղարը նաև նշել է, որ Շվեդիան և Ֆինլանդիան՝ որպես հրավիրված երկրներ, կկարողանան մասնակցել Մադրիդում կայանալիք ՆԱՏՕ-ի գագաթնաժողովին, սակայն նրանք դժվար թե դառնան Դաշինքի անդամության թեկնածուներ, եթե մինչև հունիսի 28-ը Թուրքիայի պահանջները չկատարվեն։ «Իմ նպատակն է արագացնել Դաշինքի ընդլայնման գործընթացը, և մենք դեռ ժամանակ ունենք դրա համար»,- նշել է նա։