«Բերձորը շրջանցող ճանապարհ է կառուցվում. 2-3 ամիս հետո մենք կկորցնենք ամբողջ Բերձորի շրջանը». Իշխան Սաղաթելյան

«Իրականում Ադրբեջանի կողմից կառուցվում է այլընտրանքային ճանապարհ, որին կարծես թե, Նիկոլն ու Ալիեւը ունեն դավադիր համաձայնություն, որ մենք կորցնելու ենք այսօրվա Բերձորի (Լաչինի) ճանապարհը»: Այս մասին, այսօր՝ հունիսի 10-ին, Ֆրանսիայի հրապարակում մամուլի ասուլիսի ժամանակ ասաց ԱԺ փոխխոսնակ Իշխան Սաղաթելյանը:

«Այսինքն դեպի Ստեփանակերտ կառուցվում է շրջանցող ճանապարհ, որը հիմա կառուցվում է եւ շահագործման կհանձնվի 2-3 ամիս հետո: Եթե այդ ճանապարհը գործի, դա նշանակում է, որ մենք ամբողջությամբ կորցնելու ենք Բերձորի շրջանը, այդ թվում Աղավնոն, որոշ այլ հայկական գյուղեր: Ամենակարեւորը, թշնամու  ենթակայության տակ են անցնելու մեր ողջ կոմունիկացիաները, այսինքն գազի, էլեկտրաէներգիայի: Սա նշանակում է ամբողջական գտնվելու ենք կախման մեջ, եւ այն, որ ասում էինք Արցախի հայաթափում, նաեւ սա նկատի ունենք: Սա հերթական դավադիր ծրագիրն է»,-ընդգծեց Սաղաթելյանը: