Եթե լցակայանը լիցքավորի վկայագրում չունեցող մեքենայի գազաբալոնը, 200 հազար դրամով կտուգանվի

Օգոստոսի 1-ից տրանսպորտային միջոցների վրա տեղադրված գազաբալոնները չեն լիցքավորվի, եթե գազաբալոնները տեղադրված կամ վկայագրված չէ լիցենզավորված կազմակերպության կողմից: Այս մասին այսօր՝ հուլիսի 13-ին, մամուլի ասուլիսի ժամանակ նշեց ՏԿԵ նախարարության ավտոմոբիլային  տրանսպորտի քաղաքականության լիցենզավորման եւ թույլտվությունների վարչության պետ Խաչիկ Սողոմոնյանը:

Նրա խոսքով, եթե մեքենայի չվկայագրված գազաբալոնը լիցքավորվի, ապա գազալցակայանը կտուգանվի առաջին անգամ 200 հազար դրամի չափով, երկրորդ անգամ՝ ավելի շատ: Իսկ ահա ավտոմեքենայի վարորդը չի տուգանվի:

«Այն վարորդները, որոնք չեն իրականացրել իրենց ավտոմեքենայի վրա տեղադրված գազաբալոնների վկայագրման գործընթացը, պետք է մոտենան լիցենզավորված կայաններ: Այդ կայանների ցանկը եւ հասցեները տեղադրված է մեր նախարարության կայքում: Դրանց թիվը 23 է:

Վկյագրման այդ տվյալները մուտքագրվելու են էլեկտրոնային շտեմարան: Այս պահին էլեկտրոնային շտեմարանը պատրաստ է, կայանների մեծ մասը միացված են էլեկտրոնային շտեմարանին: Որոշ կայաններ արդեն իրականացնում են վկայագրման գործընթացը եւ տվյալները տեղադրում են շտեմարանում: Այդուհանդերձ, սկզբնական շրջանում լավ կլինի, որ վարորդներն իրենց ձեռքին ունենան վկայագրման թղթային տարբերակը՝ գաալցակայաններում բալոնը լիցքավորելու համար: Գազալցակայանները շուտով կմիացվեն շտեմարանին եւ իրենք եւս հնարավորություն կունենան ստուգելու՝ տվյալ մեքենայի վրա տեղադրված գազաբալոնը վկայագրված է, թե ոչ: Իրենք մեքենայի համարանիշները մուտքագրելով կարողանալու են տեսնել՝ այդ մեքենայի գազաբալոնը վկայագրված է, թե ոչ»,-ասաց Սողոմնյանը՝ հավելելով, որ հիմնականում գազաբալոնները վկայագրվում են երկու տարով:

Նա ընդգծեց, որ պետք է վկայգրվեն բոլոր գազաբալոնները, թե սեղմված գազով, թե հեղուկ գազով լիցքավորվածները:

Դիտարկմանը, որ վկայագրման համար հերթերը հասել են մինչեւ սեպտեմբեր, ինչպե՞ս է լուծվելու այդ հարցը, Խաչիկ Սողոմոնյանը պատասխանեց, որ դա մեր հասարակության սովորությունն է՝ ամեն ինչ թողնել վերջին օրվան, իսկ ընդհանրապես, մարդիկ կարող են վկայագրում իրականացնել նաեւ օգոստոսի 1-ից հետո, պարզապես չեն կարող լիցքավորել ավտոմեքենաներն այդ ընթացքում:

«Հայաստանում հստակ տվյալներ չկան, թե քանի մեքենա է շահագործվում գազաբալոններով: Այս գործընթացը հնարավորություն կտա իմանալու այդ քանակը:

Բացի այդ, գազաբալոններն ունեն նաեւ շահագործման ժամանակահատված եւ այս գործընթացը թույլ կտա, որ շհագործման ժամկետը լրացած գազաբալոնները փոխարինվեն: Վարորդները պետք է պատրաստ լինեն, որ եթե նման խնդիր լինի, իրենց գազաբալոնները կարող են նաեւ փորձարկումը չանցնել»,-ասաց պաշտոնյան: