Կետը դուրս է թռել ջրից ու վայրէջք կատարել նավակի վրա (տեսանյութ)

ԱՄՆ Մասաչուսեթս նահանգի Պլիմութ քաղաքում կետը դուրս է թռել ջրից և վայրէջք կատարել նավակի վրա։ The New York Post-ն ուշադրություն է հրավիրել միջադեպի տեսանյութի վրա։

Ականատես Ռայդեր Փարքհերսթը պատմել է, որ ծովային կաթնասունը երեք մետր դուրս է թռել ջրից, հարվածել նավակին ու գլորվել մյուս կողմ։ Արդյունքում նավը վնասվել է, սակայն շարունակում է օգտագործելի մնալ։

«Դա խելահեղություն էր: Տղան սխալ պահին սխալ տեղում է հայտնվել, վերջ»,- ասել է տղամարդը՝ նկատի ունենալով նավակի տիրոջը:

Պլիմութ նավահանգստի վարպետ Չադ Հանթերն ասել է, որ միջադեպից ոչ ոք չի տուժել: Նա ընդգծել է, որ ամեն ինչ կարող էր շատ ավելի վատ ավարտվել բոլոր ներգրավվածների համար: «Նման դեպքերը բավականին հազվադեպ են, բայց շատ վտանգավոր նավակների սեփականատերերի համար»,- ասել է նա։