ՔՊ-ականները համայնքներում «գործի» են անցել. նախկինների ձեռագիրը կրկնվում է

Սեպտեմբերի վերջին Հայաստանի մի շարք համայնքներում սպասվում են ՏԻՄ ընտրություններ, բնականաբար, ՔՊ-ական համայնքապետերի ԺՊ-ները և թեկնածուները արդեն իսկ լծվել են գործի և ջանք ու եռանդ չեն խնայում իրենց ընտրողների սիրտը շահելու համար:

Դիցուք՝ տիեզերական ջանքերի գնով Վեդիի համայնքապետի աթոռին բազմած Գարիկ Սարգսյանը անվճար ուսանողական երթուղիներ է հանել այսպես կոչված` գիծ: Բնականաբար, այս քայլը միայն ու միայն գովելի է, սակայն արդյոք այդ բարեգործությանը Սարգսյանին դրդել է միայն վրա հասած սեպտեմբերը, թե նաև սեպտեմբերի վերջին Վեդիում սպասվող համայնքապետի ընտրությունը, որտեղ, ի դեպ, Սարգսյանի շանսերն այնքան էլ բարձր չեն գնահատվում:

Լույսի արագությամբ բարեկարգման աշխատանքներ են գնում նաև Բերդ համայնքում: Բերդ քաղաքի զբոսայգիները բարեկարգվել և համալրվեն են նոր մարզասարքերով: Կրկին անչափ գովելի նախաձեռնություն է, սակայն փաստենք, որ Բերդում նույնպես սեպտեմբերի վերջին սպասվում են ՏԻՄ ընտրություններ: Արդյո՞ք այսպիսով համայնքապետերանը չի ցանկանում շահել Բերդեցիների սիրտը:

Ալավերդիում ՔՊ համայնքապետի թեկնածու Արեն Մկրտչյանը, ի պատիվ իրեն, քարոզարշավը սկսել է ոչ թե ընտրություններից մի քանի շաբաթ, այլ ամիսներ առաջ: ԱԺ նիստի ընթացքում  Մկրտչյանը հայտարարել էր, որ Ալավերդիում ադամանդի գործարան կառուցելու նպատակով պետական գույք պետք է օտարվի: Ալավերդցիների սիրտը շահելու համար Մկրտչյանը պատրաստ է ցանկացած գին վճարել այս պահին: Միայն թե գինը բավական բարձր է: Ըստ էության, պետությունը հող է օտարում ադամանդի գործարանի բացմանը մի ընկերությանը, որը, ըստ մամուլի, թաթախված է տարատեսակ կոռուպցիոն գործարքների մեջ:

Ի դեպ, ժամանակին ընդդիմադիր Նիկոլ Փաշինյանը խստորեն քննադատում էր ՀՀԿ-ի նման վարքագիծը` դա համարելով կաշառք: Մինչդեռ, երբ նույնը կրկնում են արդեն իր թիմակիցները, Փաշինյանը նախընտրում է չտեսնելու տալ նման երևույթները: Ինչպես ասում են՝ իրավիճակ է փոխվել...