Pink Floyd-ի համահիմնադիրը Ուկրաինային կոչ է արել «դադարեցնել պատերազմը»

Pink Floyd-ի համահիմնադիր Ռոջեր Ուոթերսը բաց նամակ է գրել Ուկրաինայի առաջին տիկին Օլենա Զելենսկայային և կոչ արել «դադարեցնել պատերազմը»։

Ուղերձը հրապարակվել է նրա ֆեյսբուքյան օգտահաշվում:

Երաժիշտը դատապարտել է Ուկրաինային զենքի մատակարարումը և ասել, որ «վառելիք նետելը» երբեք չի օգնել ավելի արագ դադարեցնել հակամարտությունը։ Նա նաև կարծիք է հայտնել, որ ԱՄՆ-ը բավականաչափ հեռավորության վրա է գտնվում այս «կրակից» և շահագրգռված է ռազմական գործողությունների շարունակմամբ։

Նա հիշեցրել է Ելենա Զելենսկայային, որ նրա ամուսինը՝ Ուկրաինայի առաջնորդ Վլադիմիր Զելենսկին, խոստացել է հարգել Մինսկի պայմանավորվածությունները և խաղաղություն հաստատել Դոնբասում։ Ուոթերսի խոսքով՝ արդյունքում քաղաքական գործիչը շատ է փոխել կուրսը, ուստի այժմ երկիրը կառավարում են «ծայրահեղ ազգայնականության ուժերը», որոնք Ուկրաինային կանգնեցրին աղետի ճանապարհին։