Կունենա՞ Ավստրիան հայկական արմատներով նախագահ, և ի՞նչ վտանգ կա թուրք ընտրողներից․ տեսակետ՝ Վիեննայից

Հայտնի է դարձել, որ Ավտրիայի նախագահական ընտրություններին իր թեկնածությունը կառաջադրի մորական կողմից հայկական արմատներ ունեցող իրավաբան, քաղաքական վերլուծաբան և մտավորական Թասիլո Վալենթինը։

Ինչպե՞ս է ընդունել ավստրիահայությունն այս լուրը, որքանո՞վ է մեծ նրա հաղթանակի հասնելու հնարավորությունը․ մեկնաբանելով հարցը՝ վիեննահայ հասարակական գործիչ Ռազմիկ Թամազյանը ԼՈՒՐԵՐ.com-ի հետ զրույցում նշեց, որ այս հարցի շուրջ ավստրիահայության որևէ պաշտոնական ուսումնասիրություն չկա, սակայն կան ողջունողներ՝ առայժմ ներքին շրջանակում։

«Նախ պաշտոնավարող նախագահ Ալեքսանդր Վան դեր Բելենի դեմ Ավստրիայի երկու մեծ կուսակցությունները (Ժողովրդավարական ÖVP և Սոցիալիստական SPÖ) թեկնածուներ չեն ներկայացրել այս ընտրություններին։ Երկրորդը՝ Թասիլո Վալենթինն անկախ թեկնածու է, որ չունի որևէ կուսակցության հովանավորումն ու օժանդակությունը, բայց կկարողանա ձայներ հավաքել որևէ կուսակցության չպատկանող  ընտրողներից»,-նշեց մեր զրուցակիցը: 

Նրա կարծիքով, Վալենթինի ընտրվելու հարցում մեծ դեր պիտի խաղա, եթե գործող նախագահին չհաջողվի հավաքել ավելի 50 տոկոս ձայն, քանի որ այդ դեպքում, ըստ ավտրիական օրենքի, ընտրությունը շարունակվում է ամենաշատ ձայներ հավաքած երկու թեկնածուների միջև։

Այդ պարագայում Թասիլո Վալենթինը կունենա Ազատական Կուսակցութեան (FPÖ) թեկնածուից ավելի ձայն հավաքելու խնդիրը, նշում է Թամրազյանը:  

Մեր այն դիտարկմանը, թե մտավախություն կա առ այն, որ հայկական արմատների մասին տեղեկությունը կարող է խոչընդոտել ավստրիահայ գործչի ընտրապայքարին, այնպես, ինչպես ժամանակին, օրինակ, եղել է դարձյալ մորական կողմից հայ Էդուարդ Բալադյուրի դեպքում (1993-1995 թթ. եղել է Ֆրանսիայի վարչապետը), վիեննահայ մտավորականն ասաց․

«Կարող եմ ենթադրել, որ հրապարակավ հայտարարությունները կվնասեն նրան, քանզի մեծ թիվ են ներկայացնում ձայնի իրավունք ունեցող թուրք ընտրողները:  Այս պատճառով էլ առաժմս մենք որևէ գերմաներեն հայտարարություններ չենք ձեռնարկել և, հավանական է, չձեռնարկենք»: 

Արա Ալոյան