Մենք ասում ենք՝ ոչ թե միացեք մեզ, այլ եկեք միանանք իրար. Արցախում ստեղծվել է ապաքաղաքական շարժում

Արցախում ստեղծվել է ապաքաղաքական շարժում՝ «Հանուն Արցախի պաշտպանության» անունով, որը հավակնում է դառնալ նոր «Ղարաբաղ կոմիտե» կամ «Արցախյան շարժում-2»։

«Մենք կազմավորել ենք այս շարժումը նկատի ունենալով համախմբել բոլոր մարդկանց՝ անկախ իրենց քաղաքական հայացքներից, սոցիալական տարբեր խավերում գտնվելու պայմաններից, որպեսզի կարողանանք այս իրավիճակից պատվով դուրս գալ»,- անդրադառնալով շարժման գաղափարին ԼՈՒՐԵՐ.com-ի հետ զրույցում ասաց շարժման համակարգողներից, Արցախի ԿԳՄՍ նախարարության ներկայացուցիչ Արմեն Պետրոսյանը։

Պետրոսյանի խոսքով՝ այսօր առավել քան երբևէ պետք է ոտքի կանգնել ու թույլ չտալ Արցախի հայաթափումը, Արցախի շահերի անտեսումը, Արցախի քաղաքացու իրավունքների ոտնահարումը:

«Եթե 1980-ականներին ԽՍՀՄ-ը փլուզվեց, ու մենք կարողացանք դրա տակից դուրս գալ, ապա էս իրավիճակից էլ մենք կարող ենք դուրս գալ, մեզ թվում է մենք ունենք այդ ճանապարհները։ Մենք չենք ուզում համախմբել միայն Արցախի ուժերը, ուզում ենք միավորել նաև Հայաստանի, Սփյուռքի ուժերը։ Եթե այսօր ՀՀ իշխանությունները մեզնից երես են թեքել, դա չի նշանակում, որ Հայաստանն է մեզնից երես թեքել»,-նշեց նա։

Թե ինչպիսի վերաբերմունքի է արժանանում շարժման գաղափարը արցախցիների մոտ, Պետրոսյանն ասաց.

«Մենք մարդկանց հետ հանդիպման ժամանակ ասում ենք, որ հավաքվում ենք ոչ թե անհատների կամ քաղաքական ուժերի շուրջ, այլ գիտակցության գաղափարի շուրջ, գիտակցությունն էլ Արցախի անկախությունն է։ Եվ բնականաբար մարդկանց կարծիքը դրական է։ Մենք ունենք հետևյալ նպատակը՝ առաջին հերթին Արցախի ինքնիշխանության պահպանումը, երկրորդը՝ Արցախում սոցիալական արդարության վերականգնումը, և երրորդը Արցախում հիմքեր ստեղծելը երկարատև խաղաղության և բնականոն զարգացման»։

Հարցին կա՞ արդյոք վտանգ, որ կուսակցական պատկանելություն ունեցող անձինք կարող են շարժումը յուրացնել և հանրության մոտ կարծիք ձևավորեն, որ սա կուսակցական հերթական շարժումն է, Պետրոսյանը ասաց, որ նման վտանգ կա.

«Մենք աչալրջորեն հետևում ենք դրան, և փորձում ենք ամեն կերպ անել, որ շարժումը ունենա ոչ թե քաղաքական, այլ համաժողովրդական բնույթ, և ավելի շատ ուղղված լինի ոչ թե քաղաքական, այլ համազգային շահերին»։

Թե կոնկրետ ինչ քայլեր են անում այդ վտանգից խուսափելու համար Պետրոսյանը նշեց.

«Նախ այն, որ շարժումը ապակենտրոն է, կենտրոնացված չի մի անձի շուրջ, որը շարժումը կվերցնի և կօտագործի այլ նպատակով։ Եվ քանի որ համափմբվել ենք գաղափարի շուրջ, չունենք լիդեր հասկացությունը։ Մենք ասում ենք ոչ թե միացեք մեզ, այլ եկեք միանանք իրար, և եթե այդ շարժումը իրենից ուժ ներկայացնի, ինքն է իր առաջնորդներին ծնելու»։

Անդրադառնալով «Ղարաբաղ կոմիտե» կամ «Արցախյան շարժում-2» անվանումներին, Պետրոսյանը համեմատական տարավ 1980-ական թվականների հետ.

«Այն գեոպոլիտիկ ուժերը, որոնք նպաստել են որ ԽՍՀՄ-ը փլուզվի, կարծես նորից այդ նույն ուժերը տարածաշրջանում ակտիվացել են։ Եվ մենք նպատակ ունենք անել այն, ինչ 1980-ականներին։ 1988 թվականը հաջողված փորձ էր, և այդ փորձը մենք ուզում ենք նորից կյանքի կոչել»։

Զրույցը Պետրոսյանը ավարտեց կարևորելով այն մարդկանց, ովքեր ազդում են հասարակական կարծիքի վրա` նշելով, որ հենց նրանք էլ շարժման առաջնորդներից են։

Լուսինե Ալեքսանյան