Թաիլանդում հանգստից յոթ տարի անց զբոսաշրջիկը հայտնաբերել է իր առեղծվածային հիվանդության պատճառը

Ավստրալիացի զբոսաշրջիկը Թաիլանդում հանգստից յոթ տարի անց հայտնաբերել է իր առեղծվածային հիվանդության պատճառը։ Այս մասին հայտնում է The Thaiger-ը։

Ըստ հրապարակման՝ ավստրալուհի Թես Սվիֆթը կեսգիշերին արթնացել է որովայնի անտանելի ցավից և սրտխառնոցից Թաիլանդից վերադառնալուց երկու շաբաթ անց։ Աղջկան հոսպիտալացրել են, հեռացրել են կույրաղիքը, սակայն նույնիսկ վիրահատությունից հետո նրան տանջող ախտանիշները չեն անհետացել։

Աղջիկն ասել է, որ այս տարիների ընթացքում ամենամեծ խնդիրը սրտխառնոցն է եղել։ «Այս ամբողջ ընթացքում չկար մի օր, որ ես հիվանդ չզգայի», - բացատրել է նա: «Մենք փորձել ենք սրտխառնոցի դեմ ավելի քան 20 դեղամիջոց, բայց անարդյունք»:

Միայն յոթ տարի անց, և մի քանի սխալ ախտորոշումից հետո, բժիշկները վերջապես որոշեցին ստուգել հազվագյուտ մակաբույծների առկայությունը, ասել է Սվիֆթը: Արդյունքում աղջկա մարմնում հայտնաբերվել է որդ և դրա հետևանքով առաջացած գնաթոստոմոզ հիվանդություն։ Այն առաջանում է թերեփած կամ քաղցրահամ ջրի հում ձուկ, օձաձուկ, գորտ, թռչուն կամ սողուն ուտելուց հետո։ «Դա ամենավատ բանն էր, որ պատահել է ինձ հետ», - հավելել է աղջիկը: «Ես զգում եմ, որ հիվանդությունը գողացել է իմ կյանքի յոթ տարիները»,- նշել է նա: