Գերմանիան չի միջամտում ԵՄ մյուս երկրներին Ուկրաինային Leopard 2 տանկեր մատակարարելու հարցում․ Բորել

Եվրոպական միության (ԵՄ) դիվանագիտության ղեկավար Ժոզեպ Բորելը հայտարարել է, որ Գերմանիան չի միջամտում ԵՄ մյուս երկրներին Ուկրաինային Leopard 2 տանկեր մատակարարելու հարցում։ Այս մասին նա ասել է համայնքի երկրների արտաքին գործերի նախարարությունների ղեկավարների հանդիպման արդյունքներով կայացած մամուլի ասուլիսում, փոխանցում է ՏԱՍՍ-ը։

«Նախարարները քննարկել են այս հարցը։ Կարող եմ ասել, որ Գերմանիան այլ երկրների համար խոչընդոտներ չի ստեղծում Ուկրաինային Leopard 2 տանկեր մատակարարելու հարցում»,- ասել է Բորելը։

Հունվարի 20-ին Գերմանիայի ամերիկյան Ռամշտեյն ավիաբազայում կայացել է շուրջ 50 երկրների պաշտպանության նախարարների հանդիպումը, որի ընթացքում քննարկվել է Կիևին հետագա ռազմական օգնությունը։ Նիստից հետո Գերմանիայի պաշտպանության նախարար Բորիս Պիստորիուսը հայտարարել էր, որ մասնակիցները դեռևս որոշում չեն կայացրել Ուկրաինայի կողմից պահանջվող գերմանական Leopard 2 տանկերի մատակարարման վերաբերյալ։

Հունվարի 22-ին Գերմանիայի արտաքին գործերի նախարար Աննալենա Բուրբոքը հայտարարել էր, որ եթե Լեհաստանը Leopard տանկեր մատակարարի Ուկրաինային, ԳԴՀ-ն «դեմ չի լինի»: Լեհաստանում պատասխանել են, որ համապատասխան հայտարարությունը պետք է կրկնի Գերմանիայի կանցլեր Օլաֆ Շոլցը։