Էրդողանը որոշել է ընտրություններից առաջ ներել թուրքերի պարտքերը

Թուրքիայի նախագահ Ռեջեփ Թայիփ Էրդողանը հայտարարել է, որ իշխող ԱԶԿ կուսակցությունը օրինագիծ կառաջարկի միլիոնավոր թուրքերի պարտքային բեռը թեթևացնելու համար։ Այս քայլը նպատակ ունի ամրապնդել նրա ընտրական բազան այս տարվա ընտրություններից առաջ:

«Մենք ներում ենք մինչեւ 2022 թվականի դեկտեմբերի 31-ը հարկային մարմինների նկատմամբ 2000 լիրան (106 ԱՄՆ դոլար) չգերազանցող պարտքը»,-ասել է Էրդողանը կառավարության նիստից հետո ուղերձում։ Նրա խոսքով՝ օրինագիծը կտարածվի ճանապարհային երթեւեկության կանոնների խախտման համար որոշ տուգանքների և պետական հաստատություններին հասանելիք տուգանքների վրա։ 

Պարտքի մարման առաջարկը կարող է լինել երբևէ եղած ամենաթանկ նախընտրական նվերը: Երկիրը պայքարում է աշխարհի խոշորագույն գնաճային ճգնաժամերից մեկի դեմ, ընդ որում, գների աճը հասել է 85 տոկոսից բարձր շեմի, ապա անցած տարվա վերջին նվազել է մինչեւ 64 տոկոս։

Թուրքիան այս տարի արդեն բարձրացրել է նվազագույն աշխատավարձը 55%-ով և խոստացել վաղաժամկետ կենսաթոշակի ուղարկել ավելի քան 2 միլիոն աշխատողների։ Սպասվում է, որ որոշումը կառավարությանը կարժենա մոտ 13 միլիարդ դոլար: Մինչդեռ քաղաքացիական ծառայողների թոշակներն ու աշխատավարձերը բարձրացվել են 30%-ով, իսկ հուլիսին կարող է ժամանակավոր բարձրացում լինել։ Կառավարությունը նաև աջակցում է մատչելի բնակարանային ծրագրերին, որոնք ակնկալվում են, որ գանձապետարանի վրա միլիարդավոր լիրա կարժենան:

Չնայած Էրդողանը շարունակում է մնալ Թուրքիայի ամենահայտնի քաղաքական գործիչը, նրա կուսակցությունը կորցրել է աջակցությունը աղքատների շրջանում, որոնք սովորաբար նրա ամենաջերմ կողմնակիցներից էին:

Ֆինանսների և գանձապետարանի նախարար Նուրեդդին Նեբաթիի խոսքով՝ Թուրքիան անցյալ տարի արդեն տրամադրել է գրեթե 16 միլիարդ դոլարի հարկային արտոնություններ։