Թուրքական ընկերությունը երկու «Bayraktar TB2» անօդաչու է նվիրել Ուկրաինային

Թուրքական Baykar ընկերությունը անօդաչու թռչող սարքեր է նվիրաբերել Ուկրաինայի Զինված ուժերին։ Այս մասին հաղորդում է focus.ua-ն։

Ուկրաինան Թուրքիայից անվճար ստացել է երկու Bayraktar TB2 անօդաչու թռչող սարք, որոնք Ուկրաինա են մատակարարվել չորեքշաբթի՝ հունվարի 25-ին։ Այս մասին հայտնել են Ուկրաինայի պաշտպանության նախարարության գլխավոր հետախուզական վարչությունում։

«Այսօր մենք ստացանք ևս երկու անօդաչու թռչող սարք Ուկրաինայի մեծ ընկերներից և գործընկերներից՝ Baykar-ից», - ասվում է հաղորդագրության մեջ։

Գերատեսչությունում պարզաբանել են, որ ընկերությունն անօդաչու թռչող սարքերն անվճար է հանձնել Ուկրաինայի զինված ուժերին՝ «Ուկրաինայի ժողովրդին օգնելու և զավթիչներից պաշտպանվելու համար»։

«Մենք անսահման երախտապարտ ենք Baykar-ին՝ մեր պետության համար ամենադժվար ժամանակներում նրա անզիջում և մշտական ​​աջակցության համար», - շնորհակալություն են հայտնել ուկրաինական հետախուզության աշխատակիցները թուրքական ընկերությանը: