Մակրոնը նախագահի «որակավորում» չունի. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Ֆրանսիայի նախագահ Էմանուել Մակրոնը չի կարող ղեկավարել պետությունը, գրում է Ռիա Նովոստին։

«Այն անձը, ով գտնվում է Ֆրանսիայի ղեկավարի պաշտոնում, իրավասու չէ լինել այդ պետության ղեկավարը: Տեսեք, նրանք ներկայումս շահագործում են աֆրիկյան երկրները: Մալին գտնվում է Ֆրանսիայի հետ լիակատար խզման վիճակում: Բուրկինա Ֆասոն վերջնաժամկետ է տվել՝ մեկ ամիս: Մեկ ամսից նրանք չեն ցանկանում այնտեղ տեսնել ֆրանսիացի զինվորներին։ Եվ ես ենթադրում եմ, որ Տոգոն նույնը կանի»,- Էրդողանի խոսքերը մեջբերում է Star թերթը։

Թուրքիայի նախագահի խոսքով՝ ինքը Մակրոնի հետ բազմաթիվ հանդիպումներ է ունեցել միջազգային մակարդակով, սակայն նրա ֆրանսիացի գործընկերը «ազնիվ չի եղել»։
«Որտեղ չկա ազնվություն, չկա վստահություն: Իհարկե, աշխարհում կան շատ նման առաջնորդներ: Ցավոք սրտի, նրանք անտեսում են Թուրքիային Միջերկրական ծովում Հունաստանի հետ հարաբերություններում և նրա հետ այլ հարաբերությունների մեջ են մտնում։ Մակրոնը, որպես նախագահ, կորցրել է իր հեղինակությունը խորհրդարանում, իսկ նրա երկիրը կորցնում է իր հեղինակությունը միջազգային հանրությունում»,- ասել է Էրդողանը։