Հարյուրավոր միլիոններ բյուջեից՝ պարապուրդի մատնված կառույցներին

Թեև Հայաստանի իշխանությունները բողոքում են բյուջեի սուղ միջոցներից և կրճատում կարևորագույն ոլորտների ֆինանսավորումը՝ վարչապետին և կառավարությանը առընթեր շարունակում են գործել և ֆինանսավորվել այնպիսի կառույցներ, որոնց ՕԳԳ-ն մոտ է զրոյի:

Պարապուրդի առումով ամենաաչքի ընկնող կառույցն, անշուշտ, Հանրային խորհուրդն է: Թե ինչ է քննարկվում, ինչ խորհուրդներ է տալիս այս խորհուրդը՝ հայտնի չէ, քանի որ չկա մի դեպք, որ ՀԽ-ն հանրային կարծիք ձևավորեր կամ ուսումնասիրեր հանրային կարծիքը և ներկայացներ կառավարությանը, ընդ որում՝ պահպանելով քաղաքական չեզոքություն, մինչդեռ հատկապես հետպատերազմյան Հայաստանում առկա են բազմաթիվ խնդիրներ և հարցեր, որոնք կարող էին և պետք է քննարկվեին այս հարթակում: Անգամ ՀԽ պաշտոնական կայքից երևում է, թե հանրային ինչպիսի ակտիվություն է դրսևորել սույն կառույցը. վերջին նորությունը կայքում տեղադրվել է այս տարվա ապրիլ ամսին

Քչերը գիտեն, սակայն, Հայաստանում գործում է Միջուկային անվտանգության կարգավորման կոմիտե, որի ղեկավարն էր Աշոտ Մարտիրոսյանը, իսկ այս պահին կառույցի ղեկավարի պաշտոնը ընդհանրապես թափուր է: Իսկ քչերը գիտեն, որովհետև կոմիտեն գրեթե որևէ գործունեություն չի ծավալում, փոխարենը բյուջեից ստանում է կլորիկ գումարներ: 2022 թվականի բյուջեով այդ սուրբ գործին, այն է՝ Միջուկային և ճառագայթային անվտանգության կարգավորմանը բյուջեից հատկացվել է 321,670.7 մլն դրամ:  Բավական է նշել միայն, որ վերջին երկու տարվա ընթացքում տվյալ կառույցի գործունեության մասին չկա գեթ մեկ մամուլի հիշատակում, իսկ կառավարության նիստերին միջուկային անվտանգության հարցերը չեն բարձրացվում ընդհանրապես: 

Պետական վերահսկողական ծառայությանը, որի ղեկավարը Ռոմանոս Պետրոսյանն է, վերջին մեկ տարվա մեջ աչքի չի ընկել լուրջ կոռուպցիոն բացահայտումով՝ 2021 թվականի բյուջեով հատկացվել էր 755,179.0 մլն դրամ: Մինչդեռ այս կառույցի հետ հետհեղափոխական Հայաստանում Նիկոլ Փաշինյանը մեծ հույսեր էր կապում` հայտարարելով, որ ՊՎԾ-ն դառնալու է կոռուպցիայի ողնաշարը ջարդող կառույց: Մինչդեռ, այսօր արդեն պարզ է, որ Փաշինյանի անոնս արած բացահայտումներն այդպես էլ մնացին օդում: Մինչս օրս հայտնի չէ, թե ինչպիսի արդյունքներ են գրանցվել ոստիկանությունում, ԱԱԾ-ում, ՊՆ-ում և մի շարք այլ պետական կառույցներում՝ ՊՎԾ կատարած ուսումնասիրությունները:

Առանձնապես բուռն աշխատանքով աչքի չի ընկնում նաև սփյուռքի հարցերով գլխավոր հանձնակատարի գրասենյակը, մինչդեռ նույն 2021 թվականի բյուջեով ՀՀ զարգացման գործընթացներում Սփյուռքի ներուժի ներգրավման նպատակով բյուջեից հատկացվել է  70 մլն. դրամ: Գրասենյակի ղեկավար Զարեհ Սինանյանը նշանակվելուց հետո աչքի է ընկնում միայն իր բազմաթիվ և որպես կանոն՝ անարդյունավետ վոյաժներով, բացի այդ Սինանյանի գործունեության հետևանքով լուրջ վնաս է հասցվել Հայաստան-Սփյուռք հարաբերություններին, այն պարզ պատճառով, որ Սփյուռքի հետ վերջինիս երկխոսությունը, մեղմ ասած, չստացվեց: Սինանյանը այնքան «լավ» է աշխատել Սփյուռքի հետ, որ օրինակ՝ հայազգի գործարար Նուբար Աֆեյանի կողմից ստեղծված Մոդեռնա պատվաստանյութի խմբաքանակը Հայաստանը որպես նվեր ստանում է Լիտվայի հանրապետությունից, ոչ թե հայազգի Աֆեյանի ընկերությունից, իսկ վերջին երկու տարվա  թելեթոններն ընդհանրապես Հայաստան-Սփյուռք տապալված հարաբերությունների լակմուսի թուղթն են՝ ռեկորդային ցածր վստահության ֆոնին՝ ռեկորդային ցածր հավաքած գումարներով:

Տաթևիկ Ռևազյանի կողմից քաղավիացիայի կոմիտեի ղեկավարի պաշտոնը թողնելուց հետո թվում էր, թե կոմիտեն առավել ակտիվ կլուծի իր առջև ծառացած խնդիրները: Սակայն, նախորդ տարվա աշխատանքի ծավալները գնահատելով` հասկանալի է դառնում, որ հույսերը սին էին: Կոմիտեի ղեկավար նշանակված Միհրան Խաչատրյանը դեռևս նույնպես ոչնչով աչքի չի ընկել, կոմիտեի գործունեության մասին մամուլում գեթ մեկ հիշատակություն չկա, մինչդեռ բյուջեից ոլորտի առջև ծառացած խնդիրները լուծելու նպատակով դուրս էր գրվել  1,168,640.7 դրամ:

Հաջորդ կառույցը, որի գործունեության մասին գրեթե ոչինչ հայտնի չէ, հեռուստատեսության և ռադիոյի հանձնաժողովն է: Այս կառույցը ղեկավարում է Տիգրան Հակոբյանը և այն բյուջեից նախորդ տարի իր գործունեության համար ստացել է 337,386.9 դրամ:

Հանրությունը տեղյակ չէ նաև ՊՈԱԿ-ի աշխատանքից, դիցուք՝ Ազգային արխիվի, որի տնօրենն է հանդիսանում Արթուր Ստեփանյանը և որը նախորդ տարի բյուջեից ստացել է 590,176.5 դրամ: Այս կառույցը հիշատակվել է մեկ անգամ, այն էլ՝ տեղեկատվության մասին օրենքը խախտելու համատեքստում:

Ինչպես տեսնում ենք՝ հպարտ քաղաքացիներին հավաքված հարկերը, մեղմ ասած, փոշիանում են և մսխվում, քանի որ պետական բյուջեից միլիոնների, իսկ հաճախ նաև միլիարդների հատկացում ստացած կառույցները պարզապես մատնված են պարապուրդի: