Զատուլինը մեկնաբանել է Ուկրաինայում հատուկ ռազմական գործողության նպատակների մասին իր հայտարարությունը

ՌԴ Պետդումայի ԱՊՀ հարցերով հանձնաժողովի նախագահի առաջին տեղակալ, պատգամավոր Կոնստանտին Զատուլինն ասել է, որ նախօրեին խոսել է «Եդինայա Ռոսիա» խմբակցության ղեկավար Սերգեյ Նևերովի հետ Ուկրաինայում հատուկ ռազմական գործողության նպատակների չկատարման վերաբերյալ իր հայտարարությունների մասին, մոտ ապագայում կարող է ծավալուն քննարկում տեղի ունենալ։ Այս մասին հայտնում է РИА Новости-ն։

Զատուլինը նշել է, որ ցանկանում է պատասխանել սոցիալական ցանցերում հաղորդագրություններին, որտեղ քննարկում են, թե ինչպես պատժել իրեն։ Նա հավելել է, որ հատուկ ռազմական գործողության նպատակների մասին իր արտահայտությունը հանվել է կոնտեքստից։

Զատուլինն ասել է, որ հիանալի հասկանում է հատուկ գործողության դրդապատճառները և կողմ է դրա առավելագույն արդյունքների հասնելուն։

Հունիսի 5-ին «Վեդոմոստին» հայտնել էր, որ «Եդինայա Ռոսիա»-ն սկսել է քննարկել Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինին խմբակցությունից հեռացնելու հարցը։ Ավելի վաղ Զատուլինն ասել էր, որ մինչ օրս Ռուսաստանի Դաշնությունը չի հասել ռազմական գործողության սահմանված նպատակներին։