Գերմանիան չի վերադառնա միջուկային էներգիայի օգտագործմանը․ Շոլց

Գերմանիայում ատոմակայանների շահագործման վերսկսման շուրջ հետագա քննարկման կարիք չկա, հայտարարել է Գերմանիայի կանցլեր Օլաֆ Շոլցը։

Գերմանիայում ատոմակայանի կառուցումը կտևի մինչև 15 տարի, մեկ նոր կայանի համար պետք է ծախսվի 15 միլիարդից մինչև 20 միլիարդ եվրո, ասել է Շոլցը։

«Միջուկային էներգիան ավարտվել է, այն այլևս չի օգտագործվում Գերմանիայում»,- ասել է կանցլերը Deutschlandfunk ռադիոկայանին։

Կանցլերի խոսքով՝ Գերմանիայում ատոմակայանների աշխատանքի դադարեցումից հետո սկսվեց դրանց ապամոնտաժումը։

Գերմանիայի կառավարությունը հանդես է գալիս էներգիայի վերականգնվող աղբյուրների զարգացման օգտին, որոնց մասնաբաժինը երկրում էլեկտրաէներգիայի ընդհանուր արտադրության մեջ մինչև 2030 թվականը կավելացվի մինչև 80 տոկոս։

Ապրիլի 15-ին Գերմանիայի իշխանությունները էլեկտրացանցից անջատել են վերջին երեք գործող ատոմակայանները՝ «Իսար-2»-ը, «Նեկարվեստհայմ-2»-ը և «Էմսլանդը»։ Այս երեք ատոմակայանները էլեկտրաէներգիա են ապահովել ավելի քան 10 միլիոն տնային տնտեսությունների, այսինքն՝ երկրի բնակչության մոտավորապես 25%-ին։

Ատոմային էներգիան աստիճանաբար դադարեցնելու մասին որոշումը կայացվել է 2011 թվականին՝ կանցլեր Անգելա Մերկելի օրոք՝ հաշվի առնելով ճապոնական «Ֆուկուսիմա-1» ատոմակայանում տեղի ունեցած վթարի հետևանքները։