Փաշինյանը կպատժի՞ «ՔՊ արժեհամակարգին հակասող» յուրայիններին

Վերջին մեկ տարվա ընթացքում իրավապահ մարմիններն ակտիվորեն տարածում են հաղորդագրություններ, համաձայն որոնց` կալանավորվել են 2021 թվականի խորհրդարանական և վերջին ՏԻՄ ընտրությունների ընթացքում ընտրակաշառք բաժանած անձինք: Սա, իհարկե, անչափ դրական տենդենց է, քանի որ ընտրակաշառքի դեմ պայքարն արդար ընտրական ինստիտուտ ունենալու գլխավոր երաշխիքն է:

Սակայն, կա մեկ ուշագրավ հանգամանք. չգիտես ինչու, կալանավորված անձանց շրջանում բոլորն անխտիր ընդդիմադիր քաղաքական ուժերի ներկայացուցիչներ են, և կարող է տպավորություն ստեղծվել, որ իշխող քաղաքական ուժն ընդհանրապես ընտրակաշառք չի բաժանել: Մինչդեռ ընտրություններից առաջ և դրանց ընթացքում բազմաթիվ ահազանգեր էին հնչում` կապված հենց ՔՊ-ականների կողմից կատարվող ապօրինությունների մասին: Նիկոլ Փաշինյանն էլ երեկվա իր հարցազրույցի ընթացքում, մեկնաբանելով Երևանի ավագանու ընտրություններում ՔՊ կողմից վարչական ռեսուրսի կիրառման մասին տարածվող տեղեկությունները, հայտարարել էր, որ դա անհնար է, իսկ եթե լինեին նման դեպքեր, ապա կպատժվեին օրենքի ողջ խստությամբ:

Մենք կներկայացնենք այն բոլոր դեպքերը, որոնց մասին ահազանգեր են եղել մամուլում և որոնց հետևից պատկան կառույցներն այդպես էլ չեն գնացել:

Համացանցում տեսանյութ էր տարածվել, որտեղ երևում էր, որ Արգավանդ համայնքից ՔՊ-ական ավագանու ցուցակում առկա Էվելինա Ոսկանյանն ակնհայտ ընտրակաշառք է բաժանում:

«Ընտրությունների վերահսկման կոմիտեի» կողմից համացանցի մշտադիտարկման արդյունքում հայտնաբերվել է «Վանաձորի բժշկական կենտրոն» ՓԲԸ տնօրեն, «Քաղաքացիական պայմանագիր» կուսակցության պատգամավորի թեկնածու Վահագն Մկրտչյանի գրառումն այն մասին, որ նույն կուսակցության պատգամավորի երկու այլ թեկնածուների (մարզպետի և առողջապահության նախարարի պաշտոնակատարի) օժանդակությամբ, հունիս ամսից 10-20%-ով բարձրացվել է Բժշկական կենտրոնի շուրջ 370 աշխատակցի աշխատավարձը։

Գարիկ Սարգսյանը Վեդիի ընտրություններից առաջ սոցիալական աջակցության անվան տակ 5-6 մլն դրամի փող է դուրս գրել համայնքային բյուջեից:

Տեղեկություն էր տարածվել նաև, որ Վանաձորի 22 դպրոցի մոտ ՔՊ-ն փող է բաժանում։ Այդ մասին հայտնում էր «armbigbrother» տելեգրամյան ալիքը։ Հիշեցնենք՝ Վանաձորում ՔՊ քաղաքապետի թեկնածուն Լոռու մարզպետ Արամ Խաչատրյանն էր: Վերջինիս մասնակցությունը կամ կապը այս դրվագի հետ այդպես էլ չստուգվեց պատկան մարմինների կողմից:

 «Փաստերի ստուգման հարթակը» օրեր առաջ մի հետաքննություն հրապարակեց, որի համաձայն՝ իշխող ուժը համայնքապետերի միջոցով հավաքագրում է Երևանի քաղաքապետի իր թեկնածու Տիգրան Ավինյանի օգտին քվեարկողների տվյալները։ Գործընթացն էլ համակարգում է ՔՊ-ի վարչության փոխնախագահ Գևորգ Պապոյանը։

Բացի այդ, «Փաստերի ստուգման հարթակի» ներկայացուցիչը զանգել է Սպիտակի բնակավայրերի վարչական ղեկավարներին և համայնքապետի տեղակալին, ներկայացել որպես ՔՊ-ական պատգամավորի օգնական և ապացույցներ հավաքել, որ համայնքում համակարգված ձևով աշխատում և ձայներ են հավաքում ՔՊ թեկնածուի համար։ Սպիտակի համայնքապետը, հիշեցնենք, Քաջայր Նիկողոսյանն է:

2021 թվականին ՏԻՄ ընտրությունների նախաշեմին Շիրակի մարզպետարանը գումար է բաժանել է 48 ընտանիքի, որոնցից 42-ը Գյումրիից են: Այն ժամանակ մարզպետը Հովհաննես Հարությունյանն էր, ով էլ հանդիսանում էր քաղաքապետի ՔՊ-ական թեկնածուն:

Մալաթիա-Սեբաստիա վարչական շրջանի արդեն նախկին ղեկավար Դավիթ Կարապետյանն իրեն իրավունք էր վերապահում ընտրությունների անցկացման օրը մտնել ընտրատեղամաս և ագիտացիա անել։