Ինչպես բարձրացնել սեռական բավարարվածությունը

Կանադացի գիտնականները պարզել են, որ սեքսի ժամանակ հումորը կարևոր դեր է խաղում զուգընկերների միջև մտերմության ամրապնդման գործում և նպաստում է ռոմանտիկ հարաբերություններում ավելի մեծ սեռական բավարարվածությանը: Աշխատանքը հրապարակվել է The Canadian Journal of Human Sexuality (CJHS) ամսագրում:

Հումորը վաղուց ճանաչված է որպես երջանիկ հարաբերությունների կարևոր տարր: Այն օգնում է նվազեցնել լարվածությունը, ամրապնդել կապը զուգընկերների միջև և ավելի ջերմացնել փոխգործակցությունը: Այնուամենայնիվ, հումորի ազդեցությունը զուգընկերների սեռական կյանքի վրա մինչ այժմ քիչ էր ուսումնասիրված։ Հետազոտողները որոշել են լրացնել այս բացը` կենտրոնանալով այն բանի վրա, թե ինչպես է սեքսի ժամանակ հումորն ազդում հարաբերությունների վրա:

Փորձին մասնակցել է 18 և ավելի բարձր տարիքի 196 մարդ, ովքեր ռոմանտիկ հարաբերությունների մեջ են եղել առնվազն չորս ամիս: Մասնակիցների միջին տարիքը 20,3 տարեկան էր, իսկ հարաբերությունների տեւողությունը՝ մոտ երկու տարի։

Հետազոտությունը գնահատել է ընդհանուր հարաբերությունները և սեռական հարաբերությունների բավարարվածությունը՝ օգտագործելով տարբեր թեստեր, ինչպես նաև դիտարկվել են սեքսի ժամանակ հումորի կիրառման օրինակներ: Մասնակիցները նկարագրել են, թե որքան հաճախ են հումորն օգտագործում ինտիմ իրավիճակներում, ինչ ձևերով է այն դրսևորվում և ինչ հույզեր է առաջացնում:

Արդյունքները ցույց են տվել, որ սեքսի ժամանակ հումորը ռոմանտիկ հարաբերությունների սովորական տարր է և հաճախ դրական ազդեցություն է ունենում։ Զույգերը կատակներ են անում՝ հաղթահարելու օրինակ՝ սեքսի ժամանակ անհարմար պահերը: Սա օգնում է նվազեցնել լարվածությունը և ամրապնդել մտերմությունը: Հումորը նաև թեթեւություն է հաղորդում հարաբերություններին՝ ստեղծելով հանգստի և հաճույքի մթնոլորտ:

Դրական կատակները ամրապնդում են հարաբերությունները և հանգեցնում ավելի մեծ սեռական բավարարվածության: Ըստ հետազոտության՝ բացասական կատակները, թեև հազվադեպ են հանդիպում, բայց տհաճություն են պատճառում, նվազեցնում վստահությունը և երբեմն փչացնում տրամադրությունը:

Հեղինակները շեշտում են, որ արդյունքները հատկապես արդիական են երիտասարդ զույգերի համար։