«Հպարտ քաղաքացիների» շնորհիվ պաշտոն ստացածները դարձել են արտոնյալ

Թվում էր, թե 2018 թվականին Հայաստանում տեղի ունեցած իրադարձությունների հիմքում հեղափոխականների ցանկությունն է կոտրել էլիտաների և հասարակ, շարքային քաղաքացիների միջև տարիներ շարունակ կառուցված անջրպետը: Սակայն, հեղափոխությունից 5 տարի անց տպավորություն է, որ այդ պատը ոչ միայն չի քանդվել, այլ մի բան էլ ավելի է ամրապնդվել: Բանն այն է, որ ՔՊ-ական պաշտոնյաներն առիթը չեն կորցնում և բոլոր միջոցներն օգտագործում են հպարտ քաղաքացիների ֆոնին իրենց առավելությունն ընդգծելու համար:

ԱԺ-ն այսօր որոշեց, որ Հայաստանի Հանրապետությունում օդանավակայանների պաշտոնական պատվիրակությունների սրահներից պաշտոնատար անձանց, նրանց ընտանիքի անդամների եւ օտարերկրյա պաշտոնական պատվիրակությունների օգտվելու կարգը կսահմանվի վարչապետի որոշումներով:

Սա միակ արտոնությունը չէ, որ ստացել են ՔՊ-ական պաշտոնյաները և նրանց ընտանիքները: Կառավարության նիստում հավանության արժանացրեց նախագահին, վարչապետին եւ ԱԺ նախագահին, ինչպես նաեւ նրանց ընտանիքի անդամներին պետական բյուջեի միջոցների հաշվին բժշկական օգնության ու սպասարկման կազմակերպման եւ ֆինանսավորման մասին որոշման նախագիծը։ Հետայսու ոչ միայն այդ երեք բարձրաստիճան պաշտոնյաները, այլեւ նրանց կանայք, երեխաներն ու ծնողները բուժում կստանան մեր վճարած հարկերի հաշվին։

Ինքն իրեն բավական արտոնյալ է զգում Շիրակի փոխմարզպետ Ալբերտ Այվազյանը:  Այվազյանն Ախուրյանի համայնքապետին դիմում էր գրել` պահանջով, որ Ախուրյան խոշորացված համայնքին պատկանող «Լեքսուս RX 350» մեքենան տրամադրեն ՔՊ խմբակցությանը, որն էլ կցվել էր անձամբ իրեն: Կարճ ժամանակ անց, երբ հայտնի էր դարձել, որ «Լեքսուսն» օգտագործվում է փոխմարզպետի կողմից միայն անձնական նպատակներով, համայնքի ավագանին կրկին քննարկման էր դրել հարցն ու համայնքի «Լեքսուսը» հետ վերցրել Շիրակի փոխմարզպետից:

Անդրանիկ Քոչարյանը մի որդուն ազատում է բանակից՝ թքած ունենալով, որ պաշտպանության և անվտանգության խորհրդարանական հանձնաժողովի նախագահ է, իսկ մյուսին ուղարկում է Ստեփանակերտի Էլիտար զորամաս, իսկ պատերազմի ժամանակ տարհանում է ապահով տեղ՝ թքած ունենալով որ մնացած ծառայողներն այնտեղ զոհվում են։

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը մոտ 32 մլն դրամ արժողությամբ Toyota Prado ամենագնացի մասին է։ Դրա համար մրցույթ է հայտարարվել, որտեղ այնպիսի պարամետրեր են նշել, որոնցով հնարավոր չէ ավելի էժան ու ցածր դասի մեքենա ձեռք բերել։ Օրինակ՝ շարժիչի հզորությունը պետք է լինի առնվազն 3,5 աշխատանքային ծավալով եւ ոչ պակաս 250 ձ/ուժ-ից, պետք է ունենա all wheel drive համակարգ, տարատեսակ այլ հաճելի մանրուքներ, իսկ վազքը պետք է լինի ոչ ավելի, քան 60 հազար կմ։ Այսինքն՝ կարող է ձեռք բերվել նաեւ մասնավոր անձից եւ  լինել օգտագործված։ Մեզ ասացին, որ համայնքապետը դա հատուկ է արել, որպեսզի կոնկրետ անձից ձեռք բերվի կոնկրետ մեքենա։ Մրցույթն առաջին փուլով չի կայացել, քանի որ տվյալ անձը փաստաթղթերը թերի է ներկայացրել ու չի կարողացել մասնակցել։

Պատգամավոր Հայկ Կոնջորյանի վերջերս կայացած «բիզնեսդասային» թռիչքը դուր չէր եկել նաեւ իշխանական էլիտային: Մամուլը գրել էր, որ Ֆրանսիայից Հայաստան վերադարձող Կոնջորյանը ինքնաթիռի «բիզնես» դասի հատվածում է նստած եղել, ինչը թե՛ գործադրի, թե՛ օրենսդրի անդամների համար քննարկման իրական ու լուրջ թեմա է դարձել:

Նիկոլ Փաշինյանի աջակիցը հրապարակայնորեն ատելության խոսք է տարածում՝ Արցախի և արցախցիների նկատմամբ։ Ոմն Արսեն Ավագյան, որը, ըստ ՖԲ֊ում առկա տեղեկատվության, ապրում է Սիսիանում և ակնհակտորեն իր աջակցությունն է հայտնում գործող իշխանություններին, արցախցիների հասցեին ակնհայտ ատելության խոսք է հնչեցնում, ինչն, ի դեպ, քրեորեն պատժելի արարք է և մեղադրում է արցախցիներին՝ Արցախը հանձնելու մեջ, նշում է, թե իբրև հայը տարիներ շարունակ աշխատել է, արցախցիներն էլ՝ կերել։