Ապագա կա՞․ ՔՊ-ական պաշտոնյաները տնավորվում են արտասահմանում

Թեև ՔՊ-ական պաշտոնյաները վերջին ընտրությունների ընթացքում իրենց քաղաքական պայքարի համար ընտրել էին հայտնի՝ «Ապագա կա, կա ապագա» կարգախոսը, վերջիններիս պահվածքը և գործնական քայլերը ստիպում են կասկածել, որ իրենք՝ ՔՊ-ականները, այդ ապագային հավատում են և վստահում են ապագայի Հայաստանին:

Դիցուք՝ Կոռուպցիայի կանխարգելման հանձնաժողովի անդամ Նարեկ Համբարձումյանը 2019 թվականին Բաթումիում բնակարան է ձեռք բերել:

էկոնոմիկայի փոխնախարար Նարեկ Տերյանը 2015 թվականից բնակարան ունի Մոսկվայում, 2011 թվականին էլ նա դարձել է ավտոտնակի սեփականատեր: 

2019-ին Նիկոլ Փաշինյանի հրամանով Իսրայելում ՀՀ դեսպան նշանակված և այնուհետև ազատված Արմեն Սմբատյանը անշարժ գույք է ձեռք բերել Մոսկվայում և Դուբայում: 

Սփյուռքի հարցերով գլխավոր հանձնակատարը անշարժ գույք ունի ԱՄՆ Գլենդել քաղաքում, որը, սակայն, զլացել է ներառել իր տարեկան հայտարարագրի մեջ: 

Էկոնոմիկայի փոխնախարար Անի Իսպիրյանը բնակարանի սեփականատեր է Մոսկվայի Նովոմոսկովսկի շրջանում:

Բոլորի հիշողության մեջ թարմ են վարչապետի աշխատակազմի ղեկավարի նախկին տեղակալ (ղեկավարն էլ չէ, նրա տեղակալ) Բագրատ Բադալյանի կողմից ԱՄՆ-ում մոտավորապես 585 հազար դոլարանոց տուն գնելու մասին աղմկահարույց հրապարակումները:

Արգենտինայի հանրապետությունում ՀՀ արտակարգ և լիազոր դեսպան Հովհաննես Վիրաբյանը 2016 թվականին բնակարան է գնել Մոսկվայի Կրասնոգորսկի շրջանում:

Հարց է առաջանում՝ ինչո՞ւ են հեղափոխությունից հետո հեղափոխական պաշտոնյաները ձգտում տնավորվել արտասահմանում: Իսկ գուցե նրանց կերտած Նոր Հայաստանում ամեն բան այնքան աննախադեպ է և հրաշալի, որ վերջիններս արդեն իսկ աչքի տակ ունեն արտագաղթելու հեռանկարը, և դա է պատճառը, որ մեկը մյուսի հետևից անշարժ գույք են ձեռք բերում արտերկրում՝ արտերկրի մեր հայրենակիցներին էլ այդ ընթացքում կոչեր հղելով գալ և բնակվել, ներդրումներ անել հայրենիքում: