Ինչ ճակատագիր է սպասվում «հեղափոխական արժեքներից» շեղված ՔՊ-ականներին

Նիկոլ Փաշինյանի հրապարակային ելույթներից հաճախ կարելի է ենթադրել, որ նրա համար թիմակիցների կողմից հեղափոխության արժեքները դավաճանելը հանցագործությանը համարժեք երևույթ է: Վարչապետը մշտապես նշում և ընդգծում է, որ նման ՔՊ-ականները իրենց թիմում տեղ չունեն, բայց արի ու տես, որ վերը նշված հեղափոխական արժեքները դավաճանողների թիվը գնալով աճում է:

Օրինակ՝ քյասիբ հեղափոխականների անվան տակ իշխանության եկածները պետք է որ առաջնահերթ մտածեին իրենց խոսքերով՝ 30 տարի կեղեքվող ժողովրդի մասին, բայց պարզվում է, որ մտածել են առաջին հերթին իրենց սոցիալական բարեկեցության մասին։

Օրինակ՝  Լենա Նազարյանը 2018  թվականին հայտարարագրել էր 1,000,000.00 դրամի եկամուտ և անհատական բնակելի տուն: Արդեն 2021 թվականին Նազարյանը հայտարարագրել է անհատական բնակելի տուն, բնակարան ՝ բազմաբնակարան շենքում, բանկային հաշիվների մնացորդը կազմել է 2,000,000.00 դրամ, եկամուտները՝ 9,446,830.00 դրամ, ստացված վարկերը՝ 21,520,015.00 դրամ:

Ռուբեն Ռուբինյանը 2018 թվականին նշանակվել էր ՀՀ ԱԳՆ փոխնախարար և հայտարարագրել էր ընդամենը 150,000.00 դրամի եկամուտ:  2021-ին արդեն նա հայտարարագրել է անհատական բնակելի տուն Երևանի Շենգավիթ վարչական շրջանում, 45,500,000.00 և 2,400,000.00 դրամի հանձնած և վերադարձված փոխառություն «Կանաչ Թաղ» ՍՊԸ-ից, բանկային հաշիվների մնացորդը կազմել է 8,271,921.00 դրամ, հաշվետու տարվա եկամուտները՝ 43,459,898.00 դրամ:

Գնել Սանոսյանը 2018-ին զբաղեցնում էր բնապահպանության նախարարի տեղակալի պաշտոնը, նա հայտարարագրել էր հետևյալ գույքն ու ունեցվածքը՝ անհատական բնակելի տուն, հողամաս: Սանոսյանի դրամական միջոցները պաշտոնը ստանձնելու օրվա դրությամբ կազմել են 1,100,000.00 ՀՀ դրամ և 90,000.00 ռուսական ռուբլի: 2021-ի հայտարարագրում արդեն իսկ տեսնում ենք 2020 և 2021 թվականներին ձեռք բերված անհատական բնակելի տունն ու հողամասը, 45,880,000.00 դրամի հանձնած և վերադարձված փոխառությունները Միկշին ՍՊԸ-ից: Սանոսյանի բանկային հաշիվների մնացորդը կազմել է 1,739,279.00 դրամ, կանխիկ դրամը՝ 3,500,000.00 ՀՀ դրամ և 150,000.00 ռուսական ռուբլի, հաշվետու տարվա եկամուտները կազմել են 61,403,056.00 ՀՀ դրամ:

Այդ նույն հեղափոխականները հայտարարում էին, որ պետք է կրճատվեն ծառայողական ավտոմեքենաները: Բայց պարզվում է, որ ճոխ պադավատների հանդեպ մեծ սեր ունեն նաև նոր իշխանության ներկայացուցիչները: Իջևանի համայնքապետ Արթուր Ճաղարյանը դեռեւս համայնքապետի պաշտոնակատար եղած ժամանակ՝ 2021 թվականին, ձեռք է բերել «Տոյոտա Պռադո» մակնիշի ծառայողական ավտոմեքենա, այն դեպքում, երբ համայնքապետարանն ունեցել է մեկ այլ՝ մի քիչ ավելի ցածր դասի «Տոյոտա»։

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը մոտ 32 մլն դրամ արժողությամբ Toyota Prado ամենագնացի մասին է։ Դրա համար մրցույթ է հայտարարվել, որտեղ այնպիսի պարամետրեր են նշել, որոնցով հնարավոր չէ ավելի էժան ու ցածր դասի մեքենա ձեռք բերել։ 

ԽԾԲ-ի դեմ պայքարը նույնպես տապալվեց: Դիցուք՝ ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանն իր ծանոթ-բարեկամներին Ազգային ժողովում աշխատանքի է տեղավորում: Այս ընթացքում Հասմիկ Հակոբյանը հասցրել է՝ հարազատ հորը՝ Արմեն Հակոբյանին տեղավորել ԱԺ վարչատնտեսական վարչության ավտոտրանսպորտային բաժնում, իր ազգական Նինա Հակոբյանին աշխատանքի է տեղավորել որպես գործավարուհի, քրոջ ամուսնուն՝ Վարոյին՝վարորդ, իր աղջկա դասընկերուհու մորը եւ մյուս ծանոթին էլ տեղավորել է խորհրդարանի բուժկետում, եւ նրանցից մեկը բուժկետի բուժքույրն է՝ Լիլիթ Օհանյանը, Իրավական ապահովման եւ սպասարկման բաժնի պետ էլ նշանակել է տվել Մարի Ստեփանյանին:

Հատուկ հանձնարարություններով դեսպան Էդմոն Մարուքյանի կինը՝ իրավաբան Տաթև Մատինյանը, նշանակվել է նորաստեղծ Արբիտրաժի հաշտարարության հայաստանյան կենտրոնի տնօրեն։ Հիշեցնենք, որ օրեր առաջ արդարադատության նախարարությունը տեղեկացրեց Հայաստանում Արբիտրաժի հաշտարարության հայաստանյան կենտրոն բացելու մասին։ 

2022թ․ մարտի 25-ին «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը զարգացման ծրագրերի մշակման աշխատանքների համար գնման պայմանագիր է կնքել «Կրատոս» ՍՊԸ-ի հետ, որը հիմնադրվել է դրանից 21 օր առաջ՝ մարտի 4-ին։ Պայմանագրի արժեքը կազմել է 900 հազար դրամ։ «Կրատոս» ՍՊԸ-ի միակ սեփականատերն ու տնօրենը պատգամավոր Դավիթ Դանիելյանի կինն է՝ Անի Անտոնյանը։

Պաշտոնյաների որդիները շարունակում են արտոնյալ լինել: Ամիսներ առաջ Ներքին գործերի նախարարության ոստիկանության Սպիտակի բաժին է դիմել Լոռու մարզի Սարամեջ բնակավայրի բնակիչ, 37-ամյա Թամարա Մինասյանը և հայտնել, որ Սպիտակ համայնքում անհայտ անձը ծեծի է ենթարկել իր ամուսնուն՝ Սարամեջ բնակավայրի բնակիչ, 42-ամյա Էդգար Հովհաննիսյանին, և վերջինս մարմնական վնասվածքներով բուժօգնության է դիմել Սպիտակ բժշկական կենտրոն։ Գ․ Նիկողոսյանի հայրը Սպիտակ խոշորացված համայնքի ղեկավար Քաջայր Նիկողոսյանն է, իսկ ծեծվածի կինը՝ Թ․ Մինասյանը, Սարամեջ բնակավայրի վարչական ղեկավարն է։ Քաղաքապետի որդին ձերբակալվել էր, այնուհետև ազատ արձակվել:

Ընտրությունների նախաշեմին կաշառք բաժանելու կամ վարչական ռեսուրսներ կիրառելու պրակտիկան նույնպես շարունակվում է:  «Փաստերի ստուգման հարթակը» օրեր առաջ մի հետաքննություն հրապարակեց, որի համաձայն՝ իշխող ուժը համայնքապետերի միջոցով հավաքագրում է Երևանի քաղաքապետի իր թեկնածու Տիգրան Ավինյանի օգտին քվեարկողների տվյալները։ Գործընթացն էլ համակարգում է ՔՊ-ի վարչության փոխնախագահ Գևորգ Պապոյանը։