Վարդան Ղուկասյանի՝ «Դոգ»-ի քաղաքական ֆենոմենը

ԿԸՀ-ն այսօր՝ սեպտեմբերի 18-ի առավոտյան, մամուլի ասուլիս է հրավիրել՝ ամփոփելու Երեւանի ավագանու ընտրությունների նախնական արդյունքները: Դրանց համաձայն, ավագանին կազմված է լինելու 5 քաղաքական ուժերի ներկայացուցիչներից: Եթե իշխող ՔՊ-ի, նախկին քաղաքապետ Հայկ Մարությանի ղեկավարած քաղաքական ուժի, ընդդիմադիր ռադիկալ սեգմենտի ձայներին հավակնող Մայր Հայաստան դաշինքի և Հանրապետություն կուսակցության ստացած ձայները քիչ թե շատ սպասելի էին, ապա կարելի է փաստել, որ այս ընտրությունների բացահայտումը Վարդան Ղուկասյանի՝ «Դոգ»-ի ղեկավարած Հանրային ձայն կուսակցության կողմից  9.68% հավաքելն էր:

Իսկ ո՞վ է Վարդան Ղուկասյանը: Նա այն անձն է, ով կախարդական փայտիկի պես հանում է իր դոսյեներից մի ֆայլ ու դարձնում այն քաղաքական փերֆորմանսի մաս: Նրա հայտարարությունները հաճախ կցվում են տարբեր քրեական գործերի կամ դառնում ինչ-որ մեկի նկատմամբ քրեական հետապնդում սկսելու պատճառ։ Ղուկասյանը բավական լուրջ տեղեկատվական ակտոր է, որը հատկապես արտակարգ իրավիճակներում կարողանում է մրցակցել ողջ (թե՛ պետական, թե՛ մասնավոր, թե՛ անհատական-ցանցային) հայալեզու մեդիայի հետ՝ միասին վերցրած։  Թերևս հենց այս հանգամանքով կարելի է բացատրել նրա  նորաստեղծ կուսակցության բավական տպավորիչ մուտքը քաղաքական դաշտ. առաջին իսկ ընտրությանը ստանալ ընտրողների 10 տոկոսի աջակցությունը՝ բավական խոսուն արդյունք է: 

Ստացվում է, որ հետախուզման մեջ գտնվող Ղուկասյանը ԱՄՆ-ում համակարգչի առջև նստած հավաքում է նույնքան ձայն, որքան տարիներ շարունակ Հայաստանում գործող կուսակցությունները, որոնք ակտիվ քարոզարշավ են իրականացրել և տասնյակ միլիոնավոր դրամներ են ծախսել դրա վրա: Մինչդեռ «Հանրային ձայն» կուսակցության  ծախսերը կազմել են ընդամենը 4 մլն 821 հազար դրամ և դրանով հանդերձ կուսակցությունը արդեն հասել է առաջատար ընդդիմադիր կուսակցությունների ժողովրդականության մակարդակին:

Ղուկասյանը արդեն իսկ հանդես է եկել հայտարարությամբ, նշելով, որ «Հանրային ձայն» կուսակցությունը պատրաստ է կոալիցիա կազմել «Ազգային առաջընթաց» կուսակցության և «Մայր Հայաստան» դաշինքի հետ: Նա նշել է՝ կողմ է, որ կամ Անդրանիկ Թևանյանը կամ Հայկ  Մարությանը դառնան քաղաքապետ, բայց վերահսկողական ապարատը պետք է անցնի «Հանրային ձայն» կուսակցությանը. Եվ պատակահան չէ, որ Ղուկասյանը հենց այս ապարատն է ցանկանում իր ձեռքը վերցնել:

Ակնհայտ է, որ եթե անգամ «Հանրային ձայնը» կոալիցիա կազմի ընդդիմադիր մյուս ուժերի հետ՝ Ղուկասյանը ոչ պակաս վտանգավոր է լինելու իշխանությունների համար, որքան եթե հանդես գա կոալիցիոն համագործակցությունից դուրս՝ միայնակ, քանի որ նա շարունակելու է իր պայքարը կոռուպցիոն երևույթների դեմ և հանդես է գալու աղմկահարույց բացահայտումներով: