ՄԱԿ-ը հայտնել է ուկրաինացի փախստականների թիվը

Ուկրաինայի շուրջ 10 միլիոն բնակիչ փախստական ​​է դարձել։ Այս մասին ճապոնական NHK հեռուստաալիքին տված հարցազրույցում ասել է ՄԱԿ-ի փախստականների հարցերով գերագույն հանձնակատար Ֆիլիպո Գրանդին։

«Զանգվածային շարժում չի եղել իրենց սովորական բնակության վայր վերադառնալու համար։ Մենք մտահոգված ենք, որ պատերազմական դժվարին իրավիճակում վերադառնալը հեշտ չի լինի»,- կիսվել է պաշտոնյան։

ՄԱԿ-ի փախստականների հարցերով գերագույն հանձնակատարի գրասենյակի տվյալներով՝ մինչ օրս 6,3 միլիոն մարդ ստիպված է եղել փախչել Ուկրաինայից, իսկ 3,7 միլիոնը՝ երկրի ներսում է փախստական դարձել։

Հանձնակատարը մատնանշել է Ուկրաինայում տիրող իրավիճակի նկատմամբ հետաքրքրության անկումը պաղեստինաիսրայելական հակամարտության վատթարացման և Գազայի հատվածում հումանիտար աղետի ֆոնին: Գրանդին ասել է, որ ներկայիս ֆինանսական աջակցությունը Կիևին բավարար չէ։

Ուկրաինայի նախկին վարչապետ Նիկոլայ Ազարովն իր հերթին Facebook սոցիալական ցանցում  գրել է, որ երկրի բնակչությունը 10 տարում նվազել է 2,5 անգամ։ Մինչ այս՝ նոյեմբերին, Ազարովը հայտնել էր, որ Ուկրաինայի բնակչությունը վերջին երկու ամսում նվազել է 4 միլիոն մարդով՝ հասնելով 19 միլիոնի։