Իսրայելում հանդես են եկել Ռուսաստանի հետ հարաբերությունների վերանայման օգտին

Իսրայելի ընդդիմության առաջնորդ Յաիր Լապիդը հանդես է եկել Իսրայելի և Ռուսաստանի միջև հարաբերությունների վերանայման օգտին՝ հաշվի առնելով Մոսկվայի դիրքորոշումը պաղեստինա-իսրայելական հակամարտության վերաբերյալ։ Այդ մասին նա հայտարարել է «Վեստի» հրապարակմանը։

«Կասկած չկա, որ երկրի ղեկավարությունը պետք է վերանայի իր դիրքորոշումը Ռուսաստանի նկատմամբ։ Պետությունները հենց այնպես չեն խզում հարաբերությունները, բայց և չեն ներում նման վիրավորանք հասցնելու դեպքում»,- կարծում է Լապիդը։

Նրա խոսքով՝ Ռուսաստանը «միանշանակորեն անցել է ՀԱՄԱՍ-ի կողմը՝ այն անվանելով օրինական կազմակերպություն»։ Նա նշել է, որ Իսրայելը, իբր, «դեռ երկար ժամանակ կդժվարանա ներել Ռուսաստանին և նրա ղեկավարությանը այն դիրքորոշման համար, որ նրանք որդեգրել են»։

Միևնույն ժամանակ, իսրայելական ընդդիմության առաջնորդը մատնանշել է Ռուսաստանի հետ հարաբերությունները պահպանելու անհրաժեշտությունը՝ «ռազմավարական բնույթի պատճառներով»։