Մոլդովայի նորանշանակ ԱԳ նախարարը չի կարողանա մուտք գործել Ռուսաստան

Մոլդովայի արտաքին գործերի նախարարության նոր ղեկավար Միխայ Պոպշոյը, ով այդ պաշտոնում նշանակվել է հունվարի 29-ին, հայտնվել է Ռուսաստան մուտք գործողների «սև ցուցակում»։ Այս մասին գրում է NewsMaker պորտալը։

Պոպշոյը հիշեցրել է, որ ինքը 2023 թվականի ամռանը հայտնվել է «սև ցուցակում»՝ լինելով Մոլդովայի խորհրդարանի անդամ «Գործողություն և համերաշխություն» կուսակցությունից։ Նրա խոսքով, «հետաքրքիր կլինի տեսնել», թե ինչպես կվերաբերվեն Կրեմլը և ՌԴ ԱԳՆ-ն արտաքին քաղաքականության դեպարտամենտի ղեկավարի պաշտոնում նրա նշանակմանը։

«Դա իրենց գործն է, ես չեմ կարող իմանալ, թե ինչ որոշում կկայացնեն։ Բայց, միջազգային չափանիշների համաձայն, դիվանագետները, չնայած երկրների միջև առկա տարաձայնություններին, աշխատում են երկխոսություն հաստատելու ուղղությամբ և պետք է ունենան դրա հնարավորությունն ու իրավունքը»,- ասել է Պոպշոյը։

Մինչ այս Մոլդովայի ԱԳՆ նոր ղեկավար Միխայ Պոպշոյը հայտարարել էր, որ Քիշնևը կշարունակի գործընկերային հարաբերություններ հաստատել Ռումինիայի հետ և ռազմավարական երկխոսություն զարգացնել Վաշինգտոնի և Կիևի հետ։ Այս մասին նախարարը հայտարարել է երդումից հետո։

Նա ընդգծել է, որ Ռուսաստանի Դաշնության հետ հարաբերություններում Մոլդովան հավատարիմ կմնա առաջին հերթին իր շահերին։ Նրա խոսքով, Մոլդովայի ինքնիշխանության և տարածքային ամբողջականության հարցերը ապագայում կդառնան մոլդովառուսական հարաբերությունների հիմքը։