Պակիստանում երկու պայթյուն է որոտացել. 28 մարդ է զոհվել

Պակիստանի Բելուջիստան նահանգում երկու պայթյուն է որոտացել։ Արդյունքում՝ զոհվել է 28 մարդ, ավելի քան 40-ը վիրավորվել է, հաղորդում է տեղական Geo TV հեռուստաալիքը։

Պայթյուններ են տեղի ունեցել Ազգային ժողովի ընտրությունների թեկնածուների գրասենյակների մոտ։ Ընտրությունները նախատեսված են վաղը՝ փետրվարի 8-ին։

Առաջին պայթյունը տեղի է ունեցել անկախ թեկնածու Ասֆանդ Խան Կաքարի գրասենյակի մոտ, ինչի հետևանքով՝ զոհվել է 15 մարդ, վիրավորվել է ավելի քան 30-ը։ Վիրավորների մեծ մասը ծայրահեղ ծանր վիճակում է։

Վաղը Պակիստանում տեղի կունենան Ազգային ժողովի և նահանգային օրենսդիր հաստատությունների ընտրություններ։ Ընտրություններին ընդառաջ՝ երկրում աճել են բռնության դեպքերը։ Մասնավորապես, հունվարի 31-ին Խայբեր Պախտունխվա նահանգում գնդակահարվել է անկախ թեկնածու Ռեհան Զեբ Խանը։ Հարձակման է ենթարկվել նաև Պակիստանի ժողովրդական կուսակցության թեկնածու Սայեդ Զուլֆիկար Ալի Շահը։ Իշխանությունները որոշել են օգտագործել զինված ուժերը՝ քվեարկության ժամանակ անվտանգությունն ապահովելու համար։