Եվրամիությունում ապաստանի նոր դիմումների թիվը նվազել է

Այս տարվա առաջին կիսամյակում Եվրամիությունում, ինչպես նաև Նորվեգիայում և Շվեյցարիայում ապաստանի դիմումների թիվը փոքր-ինչ նվազել է, բայց դեռ գերազանցում է կես միլիոնի շեմը, հայտնել է գերմանական Deutsche Welle պարբերականը։

Հունվարից մինչև հունիսի վերջ ԵՄ ապաստանի գործակալությունը (EUAA) գրանցել է ընդհանուր առմամբ 513 հազար նոր դիմում, հաղորդում է Մալթայում գործող եվրոպական գերատեսչությունը: Սա 6 հազարով պակաս է 2023 թվականի նույն ժամանակահատվածի համեմատ։

Վիճակագրությունը ներառում է ԵՄ բոլոր երկրներից, ինչպես նաև ԵՄ-ին չանդակամցող Նորվեգիայից և Շվեյցարիայից ստացված տվյալներ։ Առաջվա պես, ամենամեծ թվով դիմումներ են ներկայացվել Գերմանիայում՝ մոտ 124 հազար, ինչը կազմում է 29 պետությունների ընդհանուր թվի գրեթե մեկ քառորդը։ Ընդ որում, Գերմանիայում գրանցված փախստականների դիմումների թիվը 30 հազարով պակաս է եղել, քան մեկ տարի առաջ։

Երկրորդ հորիզոնականում Իսպանիան է, որտեղ ներկայացվել է 88 հազար դիմում, ինչը գործնականում չի տարբերվում նախորդ տարվա ցուցանիշից։ Բացի դրանից, բացարձակ թվով ամենաշատ գրանցված ապաստանի դիմումներ ունեցող երկրների առաջին եռյակը եզրափակում է Իտալիան, որտեղ պաշտպանության համար դիմել է 85 հազար մարդ՝ մեկ երրորդով ավելի, քան մեկ տարի առաջ։ Մեկ շնչին բաժին ընկնող հաշվարկով Կիպրոսը առաջատարն է, որտեղ հունվարից հունիս ամիսներին  նոր ապաստանի 4900 դիմում է ստացվել:

Ապաստանի դիմումների մեծ մասը ներկայացրել են Սիրիայի (71 հազար՝ 7 տոկոսով ավելի, քան 2023 թվականին) և Աֆղանստանի (45 հազար՝ 18 տոկոսով պակաս, քան նախորդ տարի) քաղաքացիները։ Վենեսուելայի քաղաքացիները 37 հազար դիմում են ներկայացրել, գրեթե բոլորը՝ Իսպանիայում։ Վիճակագրությունում ընդգրկված չեն  Ուկրաինայի շուրջ 4,5 միլիոն քաղաքացիները, որոնք ԵՄ-ում ռուսական շարունակվող ռազմական ագրեսիայի պատճառով ժամանակավոր պաշտպանություն են ստացել։

Մինչդեռ 2024 թվականին ապաստանի դիմումների վերաբերյալ դրական որոշումների մասնաբաժինն առաջին ատյանում աճել է, հասնելով 46 տոկոսի։

news.am