ԱԺ փոխխոսնակի կինը «դաչա» է գնել՝ կասկածելի էժան գնով

Նախկինների դղյակները հաշվող ու առգրավելու համար հազարավոր գործեր դատարան բերած ՔՊ-ականները աչք են փակում իրենց թիմում արագ հարստացողնրի վրա, որոնք, տարատեսակ մեխանիզմներով, փորձում են թաքցնել իրենց «նվաճումները» անշարժ գույքի եւ այլ կապիտալների ոլորտում։

2023 թվականին Կոտայքի մարզի Ջրվեժ համայնքում շուրջ 33 հազար ԱՄՆ դոլարով ամառանոց է ձեռք բերել ԱԺ փոխխոսնակ Հակոբ Արշակյանի կինը՝ Իզաբելլա Թադևոսյանը։ Եվ հարկ է նկատել, որ Երևանին հարակից Ջրվեժում առնվազն 20 տարի շարունակ թանկարժեք է անգամ դատարկ հողը։ Բայց, չգիտես ինչ հրաշքով։ Հայաստանում անշարժ գույքի գների սրընթաց աճի ֆոնին՝ ՔՊ-ական պաշտոնյայի կինը հաջողացրել է ֆանտաստիկ էժան գնով ձեռք բերել հողը, հետն էլ՝ մի լավ ամառանոց՝ ընդամենը 33 հազար ԱՄՆ դոլարով։

«Միամիտների համար» նշենք, որ Ջրվեժում միայն հողամասերի գները 500 քմ մակերեսի համար սկսվում է 50 000 դոլարից (համացանցի բաց աղբյուրներում ավելի թանկ է գնահատվում)։ Ուստի, հարց է առաջանում՝ ինչպես է ԱԺ փոխխոսնակի կինը հաջողացրել այդքան էժան գնով ամառանոց ձեռք բերել։ Գուցե թվերն են շփոթել հայտարարագիր ներկայացնելիս։ Իսկ մի գուցե միտումնավոր հայտարարագրում «շատ համեստ» գնով է ներկայացրել անշարժ գույքի գնումը, որպեսզի աչք չծակի, և այդպիսով՝ թաքցրել է եկամուտների աղբյուրը կամ մոլորեցրել է հայտարարագիրը հիմք ընդունած պետական կառույցին ու մեզ` քաղաքացիներիս։

Կա պրակտիկա, որ պետական պաշտոնյաները հիմնականում իրենց նոր գույքը ձևակերպում են իրենց հարազատների, մտերիմների անունով` փորձելով թաքցնել իրենց ցոփ ու շվայտ կյանքը։ Հակոբ Արշակյանը, ով ԱԺ ամբիոնից ոչ մեկ անգամ է հոխորտացել ընդդիմադիրների վրա, թե բա՝ ձեր «դաչաները», ձեր առանձնատները..., փաստացի բուկլետով միջազգային զենքի էքսպո ցուցահանդեսին ներկայանալուց հետո կարողացել է ևս մեկ գույք ձեռք բերել, այն էլ՝ առանձնատուն, ըստ այդմ հետ չմնալով կոլեգա քպ-ականներից, ովքեր ևս քայլելուց հետո ոչ միայն պաշտոններ նվաճեցին, այլեւ դարձան մի քանի բնակարանատեր Երեւանի թանկարժեք նորակառույցներում եւ ամառանոցներ գնեցին Ջրվեժում, Կարբիում եւ Ծաղկաձորում։ 

Հեղինակ՝ Հովակ Սարգսյան