Ամերիկացի միլիարդատեր Ջեֆ Բեզոսը 80 մլն դոլար արժողությամբ անձնական ինքնաթիռ է գնել

Կես միլիարդ դոլար արժողությամբ Koru առագաստանավից հետո Amazon-ի հիմնադիրը մասնավոր ինքնաթիռ է գնել, որը նրա հավաքածուում արդեն չորրորդն է, հաղորդում են միջազգային ԶԼՄ-ները։

Rolls-Royce-ի շարժիչներով աշխատող Gulfstream G700-ը համարվում է աշխարհի ամենաարագ մասնավոր ինքնաթիռներից մեկը: Ինտերիերը բաղկացած է հինգ սենյակից, լոգարանը՝ ցնցուղով և զուգարանով, ինչպես նաև մեծ խոհանոց։ Ընդհանուր առմամբ, ինքնաթիռը կարող է տեղավորել 19 ուղևորի։ Gulfstream G700-ի թռիչքի առավելագույն հեռահարությունը կազմում է ավելի քան 14 000 կմ։

JetSpy ծառայության տվյալներով՝ Բեզոսն ունի նախորդ Gulfstream G650 մոդելի երկու նմանատիպ ինքնաթիռ, ինչպես նաև ավելի համեստ շվեյցարական Pilatus PC-24 ինքնաթիռ։ Ըստ փորձագետների՝ նրա ավիացիոն հավաքածուի ընդհանուր արժեքը կազմում է 200 մլն դոլար։

Gulfstream G700 ինքնաթիռը նոր է շուկայում և ամբողջ աշխարհում միլիարդատերերի կողմից ամենասիրվածն է: Ենթադրաբար, այս տարվա հուլիսից Gulfstream G700-ի սեփականատեր է մեկ այլ ամերիկացի միլիարդատեր՝ Իլոն Մասկը։