Ճապոնիայում 5,9 բալ ուժգնությամբ երկրաշարժ է գրանցվել

Ճապոնիայի Իսիկավա պրեֆեկտուրայում նոր՝ 5,9 բալ ուժգնությամբ երկրաշարժ է գրանցվել, հայտնում է Ճապոնիայի ազգային օդերևութաբանական վարչությունը, գրում է ՏԱՍՍ-ը։

Էպիկենտրոնը գտնվել է Նոտո թերակղզու շրջանում, օջախը՝ 10 կմ խորության վրա։

Զոհերի ու ավերածությունների մասին տեղեկություններ չկան։ Հայտարարվել է ցունամիի վտանգ, սակայն րոպեներ անց նախազգուշացումը չեղարկվել է։

Առաջին երկրաշարժից 10 րոպե հետո տեղի է ունեցել երկրորդը, որի ուժգնությունը մոտ է եղել նախորդին։ Տեղի բնակիչներին նախազգուշացվել է երկրաշարժի հնարավոր կրկնության մասին և կոչ է արվել պահպանել հանգստությունն ու զգոնությունը։