Հավատը սեփական ուժերի ու այլոց նկատմամբ կարևոր է հետտրավմատիկ վերականգնման համար․ Աֆեյան

Մայիսի 17-ին Երեւանում տեղի է ունեցել նորաստեղծ «Հայկական հոգեւոր վերականգնման հիմնադրամի» շնորհանդեսը, որի ընթացքում ներկայացվել են հիմնադրամի տեսլականը, նախորդ ամիսներին արդեն իսկ իրականացված ծրագրերը եւ ապագա նախաձեռնությունները։

«Իբրեւ ազգ՝ մենք տարբեր տարաբախտությունների միջով ենք անցել, բայց վերապրել ենք մեր հավատի շնորհիվ․․․ Հավատը ներհյուսված է մեր գոյի մեջ, միահյուսված է մեր ինքնության հետ», - իր խոսքում նշել է «Հայկական հոգեւոր վերականգնման հիմնադրամի» գաղափարի հեղինակ եւ հիմնադիր Նուբար Աֆեյանը, ով Հայաստանում եւ աշխարհում հայտնի է իր մի շարք հաջողված նախագծերով՝ «Flagship Pioneering» եւ «Moderna» ընկերություններից մինչեւ «Ավրորա» մարդասիրական նախաձեռնություն։

Հավատը  սեփական ուժերի ու այլոց նկատմամբ չափազանց կարեւոր նախապայման է հետտրավմատիկ վերականգնման համար։ Ըստ Նուբար Աֆեյանի՝ հավատը կարեւոր է նույնիսկ գիտական նորարարության մեջ։ «Գիտական կամ տեխնոլոգիական ցատկեր կատարելու համար անհրաժեշտ հատուկ լավատեսությունը հաճախ սկսվում է հավատքի ակտով: Դրանով ես նկատի ունեմ հավատքն առանց փաստերի։ Սա է հավատքի բուն սահմանումը», - ասել է Աֆեյանը՝ ելույթ ունենալով Մասաչութեսի տեխնոլոգիական ինստիտուտի (MIT) 2024թ շրջանավարտների ավարտական հանդիսությանը մայիսի 31-ին։ Այսպիսի հավատ են փորձում ներշնչել շահառուներին նաեւ «Հայկական հոգեւոր վերականգնման հիմնադրամի» ծրագրերը, որոնք խարսխված են առաջատար հոգեբանական մեթոդներից մեկի՝ նառատիվային թերապիայի, հայ ժողովրդի գոյաբանական պատմության եւ հոգեւոր արժեքների վրա։