Խոշոր գումար, տասնյակից ավելի անշարժ գույք և գազալցակայանի բիզնես. պաշտոնյայի ընտանիքի ունեցվածքը

Բաբկեն Կարախանյանը Պետական եկամուտների կոմիտեի մաքսանենգության դեմ պայքարի վարչության Գուգարքի տարածաշրջանային բաժնի պետի պաշտոնը զբաղեցնում է 2023թ. հունվարից: Մինչ այդ աշխատել է նույն բաժնի Շիրակի տարածաշրջանային բաժնի, իսկ դրանից առաջ՝ նախաբացթողումային հսկողության վարչության Շիրակի տարածաշրջանային պետ: Բաբկեն Կարախանյանն ու նրա հետ փոխկապակցված անձինք Կոռուպցիայի կանխարգելման հանձնաժողով է ներկայացրել գույքի, եկամուտների և ծախսերի հայտարարագիր: Ըստ այդ հայտարարագրի՝ Բ. Կարախանյանի ընտանիքը խոշոր ունեցվածք ունի: Այս մասին հայտնում է Hetq.am-ը:

2023թ. տարեկան հայտարարագրի համաձայն՝ Բ. Կարախանյանի եկամուտը մոտ 6 մլն դրամ է, որը ՊԵԿ-ից ստացած աշխատավարձն է: Սակայն, ունի 13 մլն դրամ կանխիկ գումար:

Պաշտոնյան հայտարարագրել է 16 միավոր անշարժ գույք՝ 12 միավոր հողամաս, 3 առանձնատուն և մեկ ավտոտնակ: Նշված գույքից 5-ը բաժնային սեփականություն է, մնացածը՝ միանձնյա կամ համատեղ: Բաժնային սեփականությամբ գույքը պաշտոնյան ժառանգություն է ստացել ծնողից:

Հայտարարագրի համաձայն՝ Բաբկեն Կարախանյանը 16 միավոր անշարժ գույքի սեփականատեր է դարձել 2019-2023թթ. ընթացքում: 

Նա հայտարարագրել է նաև 2016թ. արտադրության «TOYOTA» մակնիշի ավտոմեքենա, որը 2023թ. գնել է 4 մլն դրամով:

Բաբկեն Կարախանյանի կնոջ՝ Օֆելյա Սուլթանյանի եկամուտներն ավելի շատ են: 2023թ. ունեցել է մոտ 28,5 մլն դրամ եկամուտ, որից մոտ 27 մլն դրամը ստացել է «Արբա» ՍՊԸ-ից, որպես շահաբաժին, իսկ մնացածը՝ դպրոցներից՝ աշխատավարձ:

Մաքսանենգության դեմ պայքարի վարչության Գուգարքի տարածաշրջանային բաժնի պետի կինը հայտարարագրել է 70 մլն դրամ կանխիկ գումար:

«Արբա» ՍՊԸ-ն ստեղծվել է 2013թ. փետրվարին՝ գյումրեցի Կարինե Սուքիասյանի կողմից: Սակայն մեկ ամիս անց ընկերության սեփականատեր է դարձել Օֆելյա Սուլթանյանը: Ընկերությունն  ավտոմեքենաների գազալցմամբ է զբաղվում:

2023թ. սեպտեմբերին Օֆելյա Սուլթանյանը ձեռք է բերել նաև ավտոմեքենաների գազի լիցքավորման գործունեություն իրականացնող մեկ այլ՝ «ՌԿ» ՍՊԸ-ի 85% սեփականությունը: Ընկերության մնացած 15%-ը պատկանում է «Բարգավաճ Հայաստան» կուսակցության անդամ, նախկին պատգամավոր Հրանտ Դավթյանին:

Օֆելյա Սուլթանյանը 2023թ. մոտ 15 մլն դրամով վաճառել է 2021թ. արտադրության «TOYOTA» մակնիշի ավտոմեքենան և նույն տարվա ընթացքում գնել նույն մակնիշի 2022թ. արտադրության ավտոմեքենա՝ 40 մլն դրամ արժեքով: