ՄԱԿ-ի Անվտանգության խորհուրդը Գազայում հրադադարի մասին բանաձև է ընդունել

ՄԱԿ-ի Անվտանգության խորհուրդը Գազայում հրադադարի մասին եռափուլ բանաձև է ընդունել, որն առաջարկվել է ԱՄՆ-ի կողմից։ Փաստաթղթին աջակցել են 14 երկրներ, Ռուսաստանը ձեռնպահ է մնացել։ Բանաձևը ողջունում է մայիսի 31-ին հայտարարված հրադադարի մասին նոր առաջարկը, որին համաձայնել է Իսրայելը, և կոչ է անում ՀԱՄԱՍ-ին նույնպես համաձայնվել դրան, հաղորդում են միջազգային ԶԼՄ-ները։

Այս առաջարկի իրականացումը, ինչպես նշված է բանաձևում, թույլ կտա հասնել «անհապաղ, ամբողջական և վերջնական հրադադարի՝ պատանդների, այդ թվում՝ կանանց, ծերերի և վիրավորների ազատ արձակմամբ»։ Այս առաջարկը նախատեսում է պաղեստինցի գերիների փոխանակում, իսրայելական ուժերի դուրսբերում Գազայի բնակեցված շրջաններից, պաղեստինցի խաղաղ բնակիչների վերադարձ իրենց տներ և թաղամասեր Գազայի բոլոր շրջաններում, այդ թվում՝ Գազայի հատվածում, անհրաժեշտ մասշտաբով մարդասիրական օգնության ապահով և արդյունավետ բաշխում Գազայի հատվածում բոլոր պաղեստինցի խաղաղ բնակիչների միջև:

Բանաձևի հովանավորները «մերժում են Գազայի հատվածում ժողովրդագրական կամ տարածքային փոփոխության ցանկացած փորձ՝ ներառյալ Գազայի տարածքը կրճատելու ցանկացած գործողություն», ինչպես նաև վերահաստատում են իրենց հավատարմությունը երկու պետությունների հակամարտության ուծմանը: