Սրբազանը` Հ1-ում հղած ուղերձի մասին

Սրբազան շարժման առաջնորդը վստահ է` անկախ տարբեր խոչընդոտներից, Հանրային հեռուստաընկերությունում իրենք հաղթանակի են հասել: Այս մասին Սրբազանն ասաց Երևանի Հանրապետության հրապարակում մեկնարկող հանրահավաքից առաջ լրագրողներին տված ճեպազրույցում` անդրադառնալով Հանրային հեռուստաընկերությունում իր հղած ուղերձին և դրա շուրջ տարբեր կարծիքներին։

«Մենք խնդիր էինք դրել Հանրային հեռուստաընկերությունով ուղիղ եթերում հանդես գալ և դա արել ենք` անկախ բոլոր խոչընդոտներից, ոստիկանների շարքերից, ոստիկանապետի պահվածքից։ Ուղերձում այն ինչ ես ասել եմ, շատ հստակ է, շատ պարզ, բայց փոքր քայլերով արված հաղթանակից հետո շատերն ակտիվացան ու սկսեցին խոհափիլիսոփայել։ Սիրելիներս, դաշտը բաց է, բայց խնդիրն այստեղ այլ է` մենք ուզո՞ւմ ենք հայրենիք ունենալ, թե՞ ոչ»,– ասաց Բագրատ Սրբազանը:

Խոսելով մեղադրանքների մասին, Բագրատ արքեպիսկոպոս Գալստանյանը շեշտեց` ինքն այնտեղ հարցազրույց տալու չի գնացել, ոչ էլ իրեն այդ ձևաչափով էին հրավիրել։ Ընդգծեց` իր նպատակը հարցազրույցը չի եղել, եթե այդպես լիներ ու ինքը որևէ հարցի չպատասխաներ, ապա մարդկանց դիտարկումներն ու վրդովմունքը տեղին կլիներ։

Սրբազանը նաև նշեց, որ իրենց գործունեության մեջ շարունակականություն կա, անելու են քայլեր, որոնց շնորհիվ փոքր–փոքր արդյունքներ կլինեն և ի վերջո լայն հասարակությանը հասանելի կդառնան։

Սիլվի Մուրադյան