Չինաստանը զորավարժություններ է սկսել Թայվանի շուրջ՝ այն անվանելով «նախազգուշացում»

Չինաստանի Ժողովրդաազատագրական բանակը Թայվանի նեղուցում զորավարժությունների է ուղարկել ցամաքային, ռազմածովային, ռազմաօդային ուժեր, հրթիռային ուժեր և այլ զորքեր, հայտնում է Xinhua-ն։ Չինական բանակի նավերն ու օդանավերը կմոտենան Թայվանին տարբեր ուղղություններից և կիրականացնեն «համատեղ հարձակման մանևրներ»՝ համատեղ ռազմածովային և օդային ուժերի պարեկություն, արգելափակում և վերահսկում հիմնական նավահանգիստներն ու տարածքները, հարվածներ կհասցնեն ծովային և ցամաքային թիրախներին և վերահսկում մարտադաշտը:

«Զորավարժությունները լուրջ նախազգուշացում են Թայվանի անկախության ձգտող անջատողական ուժերի դեմ և արդար ու անհրաժեշտ քայլ են ազգային ինքնիշխանությունը պաշտպանելու և ազգային միասնությունը պահպանելու համար», - ասվում է Չինաստանի բանակի հայտարարության մեջ:

Թայվանի մայրցամաքային հարցերի խորհուրդը զորավարժություններն անվանել է «բացահայտ սադրանք», որը լրջորեն խաթարում է խաղաղությունն ու կայունությունը տարածաշրջանում: Թայվանի նախագահ Լայ Ցինդեի վարչակազմը կոչ է արել Չինաստանին ճանաչել Չինաստանի Հանրապետության գոյությունը (Թայվանի պաշտոնական անվանումը-խմբ․) և հարգել ժողովրդի ընտրությունը՝ ապրելու ազատ և ժողովրդավարական ճանապարհով։

Թայվանը, որը Չինաստանը դիտարկում է՝ որպես իր տարածք, զգոնության մեջ է այն բանից հետո, երբ նախագահ Լայ Ցինդեն անցյալ շաբաթ հայտարարեց, որ Չինաստանն իրավունք չունի ներկայացնելու Թայվանը, թեև նա առաջարկել է համագործակցել Պեկինի հետ:

Ըստ Reuters-ի՝ չինացի հրամանատարները քարտեզ են հրապարակել, որում պատկերված են Թայվանի շուրջ ինը շրջաններ, որտեղ զորավարժություններ են անցկացվում՝ երկուսը կղզու արևելյան ափին, երեքը՝ արևմտյան ափին, մեկը՝ հյուսիսում, և երեքը՝ Թայվանի կողմից վերահսկվող կղզիների շուրջ՝ չինական ափերի մոտ:

«Այլ երկրներին սպառնալու համար ռազմական ուժի օգտագործումը հակասում է ՄԱԿ-ի կանոնադրության հիմնական ոգուն՝ վեճերի խաղաղ կարգավորմանը», - լրագրողներին ասել է Ազգային անվտանգության խորհրդի գլխավոր քարտուղար Ջոզեֆ Վուն:

Վաշինգտոնում ԱՄՆ նախագահ Ջո Բայդենի վարչակազմը հայտարարել է, որ վերահսկում է զորավարժությունները: «Մենք կոչ ենք անում ՉԺՀ-ին զսպվածություն ցուցաբերել և խուսափել ցանկացած հետագա գործողություններից, որոնք կարող են խաթարել խաղաղությունն ու կայունությունը Թայվանի նեղուցում և ավելի լայն տարածաշրջանում, ինչը կարևոր է տարածաշրջանային խաղաղության և բարգավաճման համար և միջազգային մտահոգության առարկա է», - ասել է Պետդեպարտամենտի խոսնակ Մեթյու Միլլերը: