Հյուսիսային Կորեան 12 000 զինվոր կուղարկի Ռուսաստան՝ պատերազմելու Ուկրաինայի դեմ․ DW

Հարավային Կորեայի հետախուզությունը և հետախուզության գլխավոր վարչությունը կարծում են, որ Հյուսիսային Կորեայի հազարավոր զինվորականներ նոյեմբերին կսկսեն մարտերը Ռուսաստանի Դաշնության համար: Սեուլը Փհենյանի կողմից Ռուսաստան զորքեր ուղարկելը դիտարկում է՝ որպես անվտանգության լուրջ սպառնալիք ողջ միջազգային հանրության համար, գրում է DW-ն։

Հարավկորեական հետախուզության տվյալներով՝ մոտ 12 000 հյուսիսկորեացի զինվորի պատրաստում են Ռուսաստանի արևելյան շրջաններում՝ ուկրաինական պատերազմին մասնակցելու համար։ Նշվում է, որ ԿԺԴՀ-ի տեխնիկական անձնակազմն արդեն տեղում է՝ օգնելու ռուս զինվորականներին հրթիռային կայանքների սպասարկման հարցում:

Ավելի վաղ Ուկրաինայի ՊՆ գլխավոր հետախուզական վարչության ղեկավար Կիրիլ Բուդանովը The War Zone-ին հայտնել էր, որ հյուսիսկորեացի զինվորները պատրաստ կլինեն մասնակցելու ռազմական գործողություններին արդեն նոյեմբերի 1-ին։ Բուդանովի խոսքով՝ ԿԺԴՀ-ի հետևակային զորքերը կօգտագործեն ռուսական տեխնիկա և զինամթերք։ Սպասվում է, որ 2600 զինվորից բաղկացած առաջին ստորաբաժանումը կուղարկվի Կուրսկի շրջան։ Անհասկանալի է, թե ուր են գնալու հյուսիսկորեական զորքերի մնացած մասը։ «Այս պահին մենք չունենք ամբողջական պատկերը», - The War Zone-ը մեջբերում է Գլխավոր հետախուզության վարչության ղեկավարի խոսքերը: