Մանկամտություն է կարծել, թե Ալիևը սրում է հռետորաբանությունը, որպեսզի լեզվակռվի արդյունքում լեգիտիմ առիթ ստեղծի` հարձակման համար․ Վարուժան Բաբաջանյան

Վարուժան Բաբաջանյանը Ֆեյսբուքի իր էջում գրել է․

 

«Ի դեպ, մանկամտություն է կարծել, թե Ալիևը սրում է հռետորաբանությունը, որպեսզի համարժեք պատասխան լեզվակռվի արդյունքում լեգիտիմ առիթ ստեղծի` հարձակման համար...

 

Նման բան հայտարարելը քաղաքական և դիվանագիտական տկարամտություն է...

 

Աշխարհում չկա որևէ ատյան, որը լեգիտիմացնում կամ ապալեգիտիմացնում է միմյանց վրա պետությունների հարձակումները։

Հարձակումները կարող են լինել թե անսպասելի, գաղտնի մշակված օպերացիաների տեսքով, թե քարոզչական ֆոնից հետո` խուճապ տարածելու համար...

 

Պետության խնդիրը իր քաղաքացիների խուճապը կանխելն ու ռազմաքաղաքական, դիվանագիտական ճանապարհներով այդ մարտահրավերներին պատասխանելն է։ Խեղճ ֊ խաղաղասիրական պատասխաններով հումանիզմ մուրալը, առավելագույնը, կարող է խղճմտանքի արցունքներ քամել մի քանի զառամյալ արվեստագետներից կամ իմ քիրացու Նենսի Փելոսիի խամրող աչքերից, բայց մեծ արտաքին խաղի մեջ ունենալու է բացարձակ զրո ազդեցություն` միաժամանակ ամբողջովին թաղելով դիմադրության ներքին ռեսուրսը։

 

Այնպես որ, պատերազմը ամեն րոպե թակում է մեր դռները, անգամ եթե առավոտյան Ալիևը հայտարարի, որ պատրաստ է իր ձեռքերով Արարատ Միրզոյանին անկողնում սուրճ մատուցել...»։