Արևմուտքը բացահայտել է՝ ինչպես կարող է անդրադառնալ ԱՄՆ պաշտպանության նախարար Օսթինի հրաժարականը

Պենտագոնի ղեկավար Լլոյդ Օսթինի՝ առաջիկայում պաշտոնից հեռանալը կարող է սպառնալ Ուկրաինայի հարցով շփման խմբի փլուզմանը։ Այս մասին գրում է Politico թերթը։

«Հաջորդ անգամ, երբ խումբը հավաքվի, ամեն ինչ շատ տարբեր տեսք կունենա։ Եթե իհարկե այն ընդհանրապես հավաքվի։ Խմբի փլուզումը կարող է հարված լինել Ուկրաինային»,- ասվում է հոդվածում:

Հրապարակման հեղինակներն ընդգծում են, որ Օսթինի հեռանալը Պենտագոնի ղեկավարի պաշտոնից հարված կլինի ռուս-ուկրաինական հակամարտությամբ զբաղվող խմբին, քանի որ այն «կկորցնի իր ամենակարևոր ոգեշնչումն ու հիմնադրին, և ոչ մի երկիր չի առաջարկել ստանձնել ղեկավարությունը»։

ՆԱՏՕ-ի պաշտոնյաները վստահ են, որ խումբը կարող է գործել առանց Օսթինի: Պոտենցիալ առաջնորդների ցուցակը կարող են գլխավորել Մեծ Բրիտանիան, որը ընդունել է դաշնակիցների առաջին հանդիպումները, և Գերմանիան, որը Ուկրաինայի զինված ուժերի կարիքների հիմնական մատակարարն էր։