Նեթանյահուի գրասենյակից հայտնել են` Մերցը նրան կհրավիրի Բեռլին

Գերմանիայում Քրիստոնեադեմոկրատական ​​և Քրիստոնեասոցիալական միությունների (CDU/CSU) հաղթող դաշինքի ղեկավար Ֆրիդրիխ Մերցը հայտարարել է, որ Իսրայելի վարչապետ Բենիամին Նեթանյահուին պաշտոնական այցով կհրավիրի Բեռլին՝ չնայած Միջազգային քրեական դատարանի (ՄՔԴ) կողմից Իսրայելի կաբինետի ղեկավարի ձերբակալման հրամանին։ Այս մասին հայտնում է հրեական պետության կառավարության ղեկավարի գրասենյակը, գրում է Euromedia24-ը։

 

«Վարչապետ Նեթանյահուն փետրվարի 23-ին ջերմ զրույց է ունեցել Ֆրիդրիխ Մերցի հետ, ով Գերմանիայի ընտրություններում հաղթելուց հետո դարձել է կանցլերի թեկնածու և շնորհավորել է նրան հաղթանակի կապակցությամբ։

 

Մերցը շնորհակալություն է հայտնել վարչապետին զանգի համար և ասել, որ կհրավիրի նրան պաշտոնական այցով Գերմանիա՝ դրանով իսկ բացահայտ վիճարկելով Միջազգային քրեական դատարանի վիճահարույց որոշումը, որը վարչապետին պատերազմական հանցագործ է ճանաչել»,-ասվում է հայտարարության մեջ։

 

Անցյալ տարվա նոյեմբերի 21-ին ՄՔԴ Նախաքննական պալատը ձերբակալության օրդեր է տվել Նեթանյահուին և պաշտպանության նախկին նախարար Յոավ Գալանտին ենթադրյալ ռազմական հանցագործությունների և մարդկության դեմ հանցագործությունների համար, որոնք կատարվել են առնվազն 2023 թվականի հոկտեմբերի 8-ից մինչև 2024 թվականի մայիսի 20-ը Պաղեստինի տարածքում` ներառյալ Գազայի հատվածը: