Վարչապետ դառնալու իմ շանսերն ամենաբարձրն են, բայց ես տենց տղա չեմ, ուրիշ ձևի տղա եմ․ Աղազարյան (տեսանյութ)

Եթե ընդդիմությունը մեզ աջակցեր, ու մենք հաջողեինք՝ Էդմոն Մարուքյանը դառնում էր վարչապետ՝ 1 տարի ժամկետով, քանի որ մենք բոլորս էլ գիտենք, որ մեկ տարի անց ՀՀ ԱԺ հերթական ընտրություններն են։ Այսինքն, մասնակիորեն իրականանալու էր մեր ընդդիմադիր գործընկերների 4 տարվա տվայտանքներն ու երազանքները։ Այս մասին լրագրողների հետ զրույցում ասաց պատգամավոր Հովիկ Աղազարյանը։ 

«Ընդդիմությանը մեկ տարվա հնարավորություն էր տրվում, իսկ Նիկոլ Փաշինյանը գնում է՝ 1 տարի հանգստանում է։  Ընդդիմադիրները, նաև Էդմոն Մարուքյանը թիմ են ձևավորում, ներկայանում են 2026 թ-ի ընտրություններին ու ժողովուրդը ձևավորում է իշխանություն։ Մենք հնարավորություն կունենայինք անցկացնելու պատմության մեջ ամենաարդար ընտրությունները։ Այլևս որևէ մեկը չէր կարող բացասական ազդեցություն ունենալ ընտրական գործընթացների վրա, սա շատ գեղեցիկ հեռանկար էր, որը մենք չունեցանք»։ 

Անդրադառնալով «Պատիվ ունեմ» խմբացության հայտարարությանը, որով մերժել էին առաջարկը՝ Աղազարյանն ասաց, որ գործընթացը դրանով չի դադարելու ու այն բաց է մնում։ 

Աղազարյանն ասաց, որ իրենք 7 թեկնածու են ունեցել, քննարկվել  է նաև իր թեկնածությունը։ «Իմ շանսերն ամենաբարձն էին, բայց ես տենց տղա չեմ, ապե՛ր, ես ուրիշ ձևի տղա եմ»,-ասաց Աղազարյանն անդրադառնալով հարցին, թե ինքն ինչ շանսեր ուներ ընտրվելու։