«Կառավարությունից ասել են, որ խնդիրը շատ կարճ ժամանակում կլուծվի». կոնյակագործներն այսօր ճանապարհ էին փակել

Երևանում Վրաստանի դեսպանատան դիմաց բողոքի ակցիա իրականացնող կոնյակագործները երկկողմանի փակել էին Ծարավ Աղբյուրի փողոցը։

Ակցիայի մասնակիցները բողոքում էին հայկական ապրանքները Վրաստանի տարածքով արտահանելու գործընթացին խոչընդոտելու դեմ։ 

Կոնյակագործները զարմանում են, թե ինչու պետք է իրենց ապրանքի կապարակնիքները պոկվեն, ուղարկվեն լաբորատոր ստուգման, եթե այդ ապրանքը Վրաստանի համար չէ․ Վրաստանը պարզապես տարանցիկ երկիր է։

Պռոշյանի կոնյակի գործարանի աշխատակիցներից մեկը հայտարարեց. «Թող մեր վրացի ընկերները դուրս գան և ասեն պատճառն ինչ է, որ մենք այսօր մեր գործարանները թողած, մեր աշխատավայրերը թողած, եկել կանգնել ենք այստեղ, որպեսզի արդարություն պահանջենք։ Արդեն մի քանի օր է՝ մենք չենք աշխատում, եթե սա շարունակական կլինի, եթե այսօր այս հարցին պատասխան և արդար լուծում չլինի, ճանապարհ ենք փակելու։ Պարոն վարչապետը ասում էր, որ մենք պետք է տուրքեր վճարենք և այլն, և այլն, հայտարարագրեր գրենք, որտեղ գրենք և ի՞նչ գրենք, եթե աշխատանք չունենք»։

Ակցիայի մասնակիցները հիշեցրին, որ մեկ շաբաթ առաջ իրենց ակցիայի ժամանակ Վրաստանի դեսպանատնից ասել էին, որ կհասկանան իրավիճակը եւ պատասխան կտան, սակայն մինչ այս պահը որեւէ պատասխան չկա։

Ավելի ուշ կոնյակակագործները հայտարարեցին, որ կառավարության մոտ բողոքի ակցիան չի կայանալու, քանի որ կառավարությունից պատասխանել են, որ շատ կարճ ժամանակում իրենց խնդիրը կլուծվի։

«Այսօր ավարտում ենք մեր ակցիան, որովհետեւ հենց նոր կառավարությունից մենք պատասխան ստացանք, որ շատ կարճ ժամանակահատվածում մեր խնդրին լուծում կտրվի։ Հուսով եմ, որ մինչեւ վաղը մենք պատասխանը կունենանք։ Եթե վաղը պատասխանը չլինի, արդեն հայտարարությամբ հանդես կգանք»,–ասաց ակցիայի մասնակիցներից մեկը։