«Կարևոր է ուշադրություն դարձնել դեռահասի վարքագծի ցանկացած փոփոխության»․ ՀՀ ԱՆ–ն զգուշացնում է

ՀՀ Առողջապահության նախարարության ֆեյսբուքյան էջի հրապարակումը․ «Հաճախ դեռահասները բախվում են մի շարք դժվարությունների, որոնք ինքնուրույն ի վիճակի չեն լինում հաղթահարել, և թմրանյութերը դառնում են իրականությունից փախչելու ուղի։
Թմրամիջոցներ գործածելու ռիսկի գործոններից են՝
▪️ հոգեկան առողջության ախտաբանություններ,
▪️ վարքային խանգարումներ,
▪️ հետսթրեսային խանգարումներ,
▪️ ցածր ինքնագնահատական կամ սոցիալական մերժման զգացում,
▪️ «ժամանակակից» լինելու ձգտում,
▪️ ըմբոստացում, կանոններին հակադրվելու միջոց։
Կարևոր է ուշադրություն դարձնել դեռահասի վարքագծի ցանկացած փոփոխության՝
 տրամադրության հաճախակի տատանումներ՝ առանց հիմնավոր պատճառների,
 հիշողության և ուշադրության վատթարացում, կենտրոնացման դժվարություն,
 ուսման մեջ թերացում,
 դյուրագրգռություն, ագրեսիվություն, կոնֆլիկտային վարք,
 մշտական հոգնածության զգացում,
 ցերեկային քնկոտություն, գիշերային անքնություն,

 պարփակվածություն, անտարբերություն ինքն իր անձի, հարազատների, ընկերների, նախկինում սիրելի զբաղմունքների նկատմամբ,
▪️ ընկերական շրջապատի փոխարինում՝ «նոր կասկածելի» վարքագծով ընկերներով,
▪️ գումարի մշտական պահանջներ, չհիմնավորված ծախսեր,
▪️ հաճախակի գաղտնի հեռախոսազանգեր:
Ֆիզիոլոգիական ախտանշաններ՝
▪️ մաշկի և տեսանելի լորձաթաղանթների արտահայտված գունատություն կամ կարմրություն,
▪️ լայնացած կամ խիստ նեղացած բբեր, կարմրած աչքեր,
▪️ տագնապային կամ սառած հայացք,
▪️ չփոխկապակցված, դանդաղացած կամ արագացված խոսք,
▪️ ախորժակի կորուստ, քաշի կորուստ,
▪️ քրոնիկ հազ,
▪️ շարժումների կոորդինացման դժվարություն։
Թմրամիջոցների գործածումը վնաս է հասցնում բոլոր օրգան-համակարգերին՝
▪️ նյարդային համակարգի խանգարումներ՝ ինտելեկտի նվազում, թուլամտություն, ծանր փսիխոզներ, հոգեկան ոլորտի այլ խանգարումներ,
▪️ սիրտ-անոթային համակարգի խանգարումներ՝ զարկերակային ճնշման կտրուկ բարձրացում, առիթմիաներ,
▪️ ստամոքս-աղիքային տրակտի գործունեության խանգարումներ,
▪️ վերարտադրողական և սեռական համակարգի գործունեության խանգարումներ` պայմանավորված սեռական հորմոնների նորմից շեղումներով»։