Որտեղ և ինչպես է Թրամփը հավանություն տվել Իրանին հարվածին․ Axios

ԱՄՆ նախագահ Դոնալդ Թրամփը վերջնական թույլտվություն է տվել հարվածներ հասցնելու Իրանի միջուկային օբյեկտներին հունիսի 21-ին՝ Նյու Ջերսիի Բեդմինսթեր գոլֆ ակումբում գտնվելու ժամանակ, հայտնում է Axios-ը՝ վկայակոչելով իրազեկ աղբյուրներին։

Չնայած գործողության հնարավոր չեղարկման մասին հրապարակային հայտարարություններին՝ հունիսի 20-ին Թրամփը հրամայել է պաշտպանության նախարար Փիթ Հեգսեթին ուղարկել B-2 Spirit ռազմավարական ռմբակոծիչներ Միսսուրիի Ուայթման ռազմաօդային բազայից։

Ինքնաթիռները օդ են բարձրացել հրամանից մի քանի ժամ անց։ Մի քանիսը դիվերսիոն մանևր են կատարել արևմտյան ուղղությամբ: Հունիսի 21-ի կեսօրին Թրամփին տեղեկացվել է, որ ռմբակոծիչները մոտենում են «անդառնալիության կետին»։ Հենց այդ ժամանակ նախագահը հաստատել է հարձակումը, որից հետո նա շտապ թռել է Վաշինգտոն՝ Սպիտակ տան իրավիճակների սենյակից վերահսկելու գործողությունը:

Հարվածի պահին հատուկ բանագնաց Սթիվեն Վիտկոֆը ուղերձ է հղել Իրանի ԱԳՆ-ին՝ ընդգծելով, որ գործողությունը թիրախային է եղել, թիրախները սահմանափակվել են միջուկային օբյեկտներով, և ԱՄՆ-ն պատրաստ է բանակցությունների՝ «սպառնալիքի չեզոքացումից հետո»։