Քուվեյթը և Բահրեյնը վերաբացել են օդային տարածքը՝ Կատարում ԱՄՆ ռազմաբազային Իրանի հարվածներից հետո

Քուվեյթի և Բահրեյնի իշխանությունները հայտարարել են իրենց օդային տարածքում թռիչքների սահմանափակումների լիակատար վերացման մասին։ Օդային տարածքի վերաբացման մասին հայտնել են երկու երկրների՝ KUNA (Քուվեյթ) և BNA (Բահրեյն) պետական ​​լրատվական գործակալությունները։

«Տրանսպորտի և կապի նախարարության քաղաքացիական ավիացիայի վարչությունը հայտարարում է Բահրեյնի Թագավորության օդային տարածքի լիակատար բացման մասին», -հաղորդել է BNA գործակալությունը։

Նմանատիպ հայտարարություն է տարածել նաև քուվեյթյան KUNA գործակալությունը՝ հղում անելով տեղական պաշտոնական մարմինների տեղեկություններին։

Ավելի վաղ տարածաշրջանում օդային երթևեկությունը սահմանափակվել էր, երբ Իրանը հրթիռային հարված էր հասցրել Կատարում տեղակայված ամերիկյան ռազմաբազային։