Tesla-ի վաճառքները Եվրոպայում կտրուկ ընկել են շուկայի աճի ֆոնին

Մայիսին նոր ավտոմեքենաների գրանցումները Եվրոպայում աճել են 1.19 տոկոսով՝ հասնելով 1.11 միլիոնի։ Էլեկտրամոբիլների և հիբրիդների պահանջարկն աճել է համապատասխանաբար 27 և 46 տոկոսով։ Սակայն ամերիկյան Tesla-ն, որը նախկինում առաջնակարգ դիրք էր զբաղեցնում, շարունակում է ֆիքսել վաճառքների կտրուկ անկում՝ միայն մայիսին՝ նվազում 28 տոկոսով, գրում է Bloomberg-ը։

Մինչդեռ եվրոպական ավտոգիգանտները, ինչպես Volkswagen (3.4%), Renault (4.6%), BMW (5.6%) և Mercedes-Benz (1.9%), ցուցադրել են աճ, իսկ չինական BYD-ն շարունակում է ընդլայնել իր ներկայությունը եվրոպական շուկայում։ Ֆրանսիական Plateforme Automobile ասոցիացիայի տվյալներով՝ մայիսին Tesla-ի վաճառքները Ֆրանսիայում ընկել են 67 տոկոսով՝ մինչև 721 էլեկտրամոբիլ։

Tesla-ի եվրոպական շուկայում կորուստները մասնագետները կապում են Իլոն Մասկի քաղաքական դիրքորոշման հետ։ Նա ակտիվորեն աջակցում էր Դոնալդ Թրամփին և վերջին շրջանում հանդես էր գալիս Եվրոպայի քաղաքականության հանդեպ հակասական հայտարարություններով, ինչը բացասաբար անդրադարձել է ընկերության հեղինակության վրա։